ރޯދަމަހު ދަނޑުވެރިންގެ ތަކެތި ވިއްކަން ނޯތު ހާބަރުގައި ވަގުތީ މާރުކޭޓެއް

ކުރިއަށް އޮތް ރޯދަމަހާ ދިމާކޮށް އަތޮޅުތަކުގެ ދަނޑުވެރިން އުފައްދާ ތަކެތި މާލޭގައި ފަސޭހަކަމާއެކު ވިއްކޭނެ އިންތިޒާމު ހަމަޖެއްސުމަށްޓަކައި، މާލެ ސަރަހައްދުގައި ވަގުތީ މާރުކޭޓެއް އެޅުމަށް ސަރުކާރުން ނިންމައިފި އެވެ. 

އެގްރިކަލްޗާ މިނިސްޓްރީން ބުނިގޮތުގައި މި މާރުކޭޓް ތަރައްގީކުރަނީ މާލެ ނޯތް ހާބަރުގަ އެވެ. އަދި އެމްޕީއެލްގެ އެހީތެރިކަމާއެކު މި މާރުކޭޓުގެ މަސައްކަތް މިހާރު ވަނީ ފަށާފަ އެވެ.

މި މާރުކޭޓުގައި ވިޔަފާރިކުރަން ބޭނުންވާ ފަރާތްތަކަށް އެ ފުރުސަތު މިހާރު ވަނީ ހުޅުވާލާފަ އެވެ. އަދި މި މާރުކޭޓުގައި ބައިވެރިވާން އެދޭ ފަރާތްތަކުން ރަށު ކައުންސިލްތައް މެދުވެރިކޮށް ހުށަހެޅުމަށް މިނިސްޓްރީން ވަނީ އިރުޝާދު ދީފައެވެ. މިގޮތުން ހުށަހަޅާއިރު، މިދިޔަ އަހަރުގެ ރޯދަމަހު އެ ރަށަކުން ބޭރުކުރި ތަކެތީގެ އަންދާސީ މިންވަރާއި، މާރުކޭޓުގައި ބައިވެރިވާން ބޭނުންވާ މީހުންގެ އަދަދު ހިމަނަންޖެހެ އެވެ.

މިނިސްޓްރީން ބުނިގޮތުގައި މި މާރުކޭޓު ތަރައްގީކުރަނީ ރޯދަމަހަކީ ރަށްރަށުން ގިނަ އަދަދެއްގެ ދަނޑުވެރި އުފެއްދުންތައް މާލެއަށް ގެންނަ ދުވަސްވަރަކަށް ވާތީ، އެ ތަކެތި ހަމަ އަގުގައި ވިއްކޭނެ މަގު ތަނަވަސްކޮށްދިނުމަށެވެ.

މި މާރުކޭޓު ހިންގުމަށް ކަނޑައަޅާފައިވާ އުސޫލުގައިވާ ގޮތުން، މާރުކޭޓަށް މުދާ ވެއްދޭނީ އަންނަ މަހުގެ 15 އިން ފެށިގެންނެވެ. އަދި އެތަނުގައި ވިއްކޭނީ ހަމައެކަނި ރާއްޖޭގައި އުފައްދާ ތަރުކާރީއާއި މޭވާ އެކަނި ކަމަށްވެސް ބުނެފައިވެ އެވެ.

މީގެ އިތުރުން، މި މާރުކޭޓުގައި ބިދޭސީންނަށް މަސައްކަތް ނުކުރެވޭނެ ކަމަށާއި، ވިޔަފާރި ކުރެވޭނީ ހެނދުނު 8:00 އިން ރޭގަނޑު 11:00 އަށް ކަމަށް މިނިސްޓްރީން ވަނީ ކަނޑައަޅާފަ އެވެ. އަދި ރޯދަމަސް ނިމުމާއެކު މާރުކޭޓު ހުސްކުރަން ޖެހޭނެ އެވެ.

މި ފުރުސަތަށް އެދި ހުށަހަޅާ ފޯމުތައް މި މަހުގެ 29 ވަނަ ދުވަހުގެ 14:00 ގެ ކުރިން އީމެއިލް މެދުވެރިކޮށް މިނިސްޓްރީއަށް ފޮނުވަން ޖެހެ އެވެ.

މާލޭގެ އިތުރުން ހުޅުމާލޭގައިވެސް ވަގުތީ މާރުކޭޓެއް އެޅުމުގެ މަސައްކަތް ކުރަމުންދާއިރު، ސަރުކާރުގެ އަމާޒަކީ ރޯދަ މަހު ރައްޔިތުންނަށް ބޭނުންވާ އަސާސީ ކާބޯތަކެތި އަގުހެޔޮކޮށް ލިބޭނެ އިންތިޒާމު ހަމަޖައްސައިދިނުމެވެ.