ވައިގެމަގުން ރާއްޖެއިން ވަގަށް ގިނަ އަދަދެއްގެ ބޭރު ފައިސާ ބޭރުކުރަން އުޅުނު އިންޑިއާ މީހަކު ޖޫރިމަނާކޮށް، އޭނާގެ އަތުން ފެނުނު 2.8 މިލިއަނަށް ވުރެ ގިނަ ރުފިޔާ ދައުލަތަށް ނަގަން ކްރިމިނަލް ކޯޓުން ހުކުމްކޮށްފި އެވެ.

ރާއްޖެއިން ސިއްރުން މުދާ ބޭރުކުރަން އުޅުމުގެ ދައުވާ ސާބިތުވެ ހުކުމް އިއްވާފައި ވަނީ އިންޑިއާގެ ރައްޔިތެއް ކަމަށްވާ އަބްދުއްރަގޫބް ނިސްތާރު ހަލީމްގެ މައްޗަށެވެ.

އޭނާގެ މައްޗަށް އެ ދައުވާ އުފުލާފައި ވަނީ މިދިޔަ އަހަރުގެ ސެޕްޓެމްބަރު މަހުގެ 2 ވަނަ ދުވަހު ވައިގެމަގުން ސްރީ ލަންކާއަށް ފުރަން އުޅުނުއިރު، އޭނާގެ އަތުން ގިނަ އަދަދެއްގެ ބޭރު ފައިސާ ފެނުމާއި ގުޅިގެންނެވެ.

އޭނާ ގެންގުޅުނު ބޭގެއް ވެލާނާ އިންޓަނޭޝަނަލް އެއާޕޯޓުގެ ސެކިއުރިޓީ ޗެކްޕޮއިންޓުން ބަލައި ފާސްކުރިއިރު، ސިޓީ އުރަތަކަކުން 104,977 ޑޮލަރާއި 31,585 ޔޫރޯ އާއި 180 ސުވިސް ފްރޭންކް އަދި 100 ދިރުހަމް ފެނިފައިވެ އެވެ. އަދި ބެކްޕެކް ތެރެއިން 32,395 ޑޮލަރާއި 18,790 ޔޫރޯ ފެނިފައިވެ އެވެ.

އެއީ ދިވެހި ރުފިޔާއިން ބަލާ ނަމަ، 2.9 މިލިއަނެއްހާ ރުފިޔާ އެވެ.

އޭނާ ވަނީ ކޯޓުގައި ތުހުމަތުތަކަށް އެއްބަސްވެފަ އެވެ. އަދި ތުހުމަތުތަކަށް އެއްބަސްވެ، ދައުލަތާ އެކު އިއުތިރާފުގެ އެއްބަސްވުމެއް ހަދާފައި ވާތީ މި މައްސަލާގައި ކްރިމިނަލް ކޯޓުން ހުކުމް އިއްވާފައި ވަނީ އެ އެއްބަސްވުމަށް ބަލައިގެންނެވެ.

ދައުލަތާ އެކު ހެދި އެއްބަސްވުމުގައި އަދަބެއްގެ ގޮތުގައި ކަނޑައަޅާފައި ވަނީ 12،000 ރުފިޔާ އިން އޭނާ ޖޫރިމަނާ ކުރުމަށާއި ކަސްޓަމްސް އިން އޭނާގެ މައްޗަށް ކޮށްފައިވާ ހަތް ލައްކަ ރުފިޔާގެ ޖޫރިމަނާ ދައްކަން ނުޖެހޭނެ ކަމަށެވެ. އަދި އޭނާގެ އަތުން ފެނުނު ބޭރު ފައިސާ ދައުލަތަށް ނަގައި، 12،000ރ. އިން ކުރި ޖޫރިމަނާ ދެ މަސްދުވަހުގެ ތެރޭގައި ދައުލަތަށް ދައްކަން ވަނީ ހުކުމް ކޮށްފަ އެވެ.