ކެނެޑާގެ މުދަލުން ކަސްޓަމްސް ޑިއުޓީ ބޮޑުކުރުމަށް އެމެރިކާގެ އަލަށް އިންތިޚާބުވި ރައީސް ޑޮނަލްޑް ޓްރަމްޕް ހުށަހަޅުއްވާފައިވާ ޕްލޭނަށް ކެނެޑާގެ ފޮރިން މިނިސްޓަރު މެލާނީ ޖޯލީ ހަރުކަށި ރައްދެއް ދެއްވައިފި އެވެ.
މެލާނީ ޖޯލީ އާއި ޙަވާލާދީ ނޫސް އެޖެންސީ އޭއެފްޕީ އިން ބުނާ ގޮތުގައި އެމެރިކާއިން ކެނެޑާގެ އުފެއްދުންތަކުން ކަސްޓަމްސް ޑިއުޓީ ބޮޑުކޮށްފިނަމަ، އޭގެ ޖަވާބުގައި އެމެރިކާ މީހުންނަށް "ޓްރަމްޕް ޓެކްސް" ނަގާނެ ކަމަށެވެ. މިއީ ހުކުރު ދުވަހު ޑޮނަލްޑް ޓްރަމްޕްގެ ވާހަކަފުޅަށްފަހު ވިޔަފާރީގެ މައްސަލައަށް ކެނެޑާއިން ދިން ފުރަތަމަ ވަރުގަދަ އަދި ރަސްމީ ޖަވާބެވެ.
އަންނަ ހަފްތާގައި އެމެރިކާގެ ރައީސްކަމުގެ ހުވާ ކުރައްވާނެ ޑޮނަލްޑް ޓްރަމްޕް ވަނީ އިގްތިސާދީ އަދި ޚާރިޖީ ސިޔާސަތުގެ ޕްލޭންގެ ތެރެއިން ކެނެޑާއިން އެތެރެކުރާ މުދަލުން 25 ޕަސެންޓް ޓެރިފް ނަގާނެ ކަމަށް ވިދާޅުވެފައެވެ. މީގެ އިތުރުން މެކްސިކޯ، ޗައިނާ އަދި އެހެން ވިޔަފާރި ބައިވެރިންގެ ގައުމުތަކުން އެތެރެކުރާ މުދަލުން ވެސް ކަސްޓަމްސް ޑިއުޓީ ބޮޑުކުރާނެ ކަމަށް ވަނީ ހުށަހަޅުއްވާފައެވެ.
ވޮޝިންގްޓަންގައި ބޭއްވުނު ނޫސްވެރިންގެ ބައްދަލުވުމެއްގައި މެލާނީ ޖޯލީ ވިދާޅުވީ، "މިއީ އެމެރިކާ މީހުން އަޅުގަނޑުމެންނާއި ދެކޮޅަށް ވިޔަފާރީގެ ހަނގުރާމައެއް ފަށާނެ ގޮތް" ކަމަށެވެ. އަދި މިއީ ދިހަވަރަކަށް އަހަރު ފަހުން ކެނެޑާއާއި އެމެރިކާއާ ދެމެދު ބޮޑު ވިޔަފާރީގެ ހަނގުރާމައަކަށް ވެގެންދާނެ ކަމަށް ވެސް އޭނާ ވިދާޅުވިއެވެ.
ކެނެޑާގެ ފޮރިން މިނިސްޓަރު އިތުރަށް ވިދާޅުވީ، ޓްރަމްޕް އެމަނިކުފާނުގެ އިޢުލާނާއި އެއްގޮތަށް ޢަމަލު ކުރައްވައިފި ނަމަ ކެނެޑާއިން ވެސް ވަނީ އަޅާނެ ފިޔަވަޅުތަކެއް ތައްޔާރުކޮށްފައި ކަމަށެވެ. އޮޓާވާގައި ތިބި ކެނެޑާ ސަރުކާރުގެ މަޞްދަރުތަކުން ބުނެފައިވަނީ އެމެރިކާއިން ނަގާ ޓެކްސްގެ ރައްދުގައި އެމެރިކާއިން އަންނަ މުދަލުން ކަސްޓަމްސް ޑިއުޓީ ބޮޑުކުރުމަށް ކެނެޑާގެ އޮފިޝަލުން ވިސްނާފައިވާ ކަމަށެވެ.
ޑޮނަލްޑް ޓްރަމްޕް ގެންދަވަނީ ކެނެޑާގެ ބޮޑުވަޒީރަށް ގަވަރުނަރު ކަމަށް ވިދާޅުވެ މަލާމާތް ކުރައްވަމުންނެވެ. ފައިލް ފޮޓޯ: އޭއެފްޕީ
ކެނެޑާގެ ބޮޑުވަޒީރު ޖަސްޓިން ޓްރޫޑޯ ވެސް ވަނީ މިއީ މުޅި އެ ބައްރަށް ނުރައްކާވާނެ ކަމެއް ކަމަށް ވިދާޅުވެ މިކަމާއި ގުޅޭ ގޮތުން ވާހަކަފުޅު ދައްކަވާފައެވެ. އޭނާ ވިދާޅުވީ ކެނެޑާއާއި ކެނެޑާގެ ރައްޔިތުންގެ ދިފާޢުގައި ފިޔަވަޅު އަޅުއްވާނެ ކަމަށެވެ. ޓްރޫޑޯ ވިދާޅުވީ، "ހުށަހަޅާފައިވާ ޓެކްސްގެ ސަބަބުން އެމެރިކާގެ ވަޒީފާތަކަށް ނުރައްކާވެ، އެމެރިކާގެ ކޮންސިއުމަރުންނަށް އަގުތައް ބޮޑުވެ، އަޅުގަނޑުމެންގެ ޖަމާޢަތުގެ ސަލާމަތަށް ނުރައްކާވެ، މުޅި ބައްރަށް އަސަރުކުރާނެ" ކަމަށެވެ.
ކެނެޑާގެ ފޮރިން މިނިސްޓަރު މެލާނީ ޖޯލީ ވިދާޅުވީ، ފުރަތަމަ މަރުހަލާގައި ކެނެޑާ ސަރުކާރުން އެމެރިކާގެ ދަގަނޑުގެ އުފެއްދުންތަކާއި، ސެރަމިކްސް އާއި ބިއްލޫރި ސާމާނާއި އޮރެންޖް ޖޫހުގެ ޓެރިފް ބޮޑުކުރާނެ ކަމަށާއި، އެ ޓެރިފް ވެސް އިތުރުވެދާނެ ކަމަށެވެ.
