ރާއްޖޭގެ ގައުމީ އެއާލައިން، މޯލްޑިވިއަންގެ ވައިޑްބޮޑީ އެއާކްރާފްޓް، އޭ330 އިން ޗައިނާއަށް ކުރާ ދަތުރުތަކުގެ އަގުތައް އިއްޔެ އާންމުކޮށް ބުކިންއަށް ހުޅުވާލައިފި އެވެ.

މޯލްޑިވިއަންގެ ވައިޑް ބޮޑީގެ ފުރަތަމަ ދަތުރު އޮތީ މި މަހު 22 ގައި ޗައިނާގެ ޗެންގްޑޫ އަށެވެ.

ޗެންގްޑޫއަށް ޓިކެޓް ވިއްކަނީ ދެކޮޅަށް 688 ޑޮލަރު (10،610ރ.) އަށެވެ.

މޯލްޑިވިއަން އިން ބުނީ ޗައިނާގެ ބެއިޖިންއަށް ފުރަތަމަ ދަތުރު އޮންނާނީ މި މަހުގެ 24 ވަނަ ދުވަހު ކަމަށާއި އެ ދަތުރަށް ދެކޮޅު ޓިކެޓުގެ އަގަކީ 788 ޑޮލަރު (12،151ރ.) ކަމަށެވެ.

ޗައިނާގެ ވެރިރަށް ޝެންހާއީއަށް ކުރާ ފުރަތަމަ ދަތުރު މި މަހު 27 އަށް ޝެޑިއުލް ކޮށްފައިވާއިރު، ދެކޮޅު ޓިކެޓުގެ އަގަކީ 777 ޑޮލަރު (11،981ރ.) އެވެ.

މީގެން ކޮންމެ ދަތުރެއްގައި 40 ކިލޯގެ ބޮޑު ބެގޭޖް އެލަވަންސެއް ލިބެ އެވެ.

މޯލްޑިވިއަންގެ މި އާ ބޯޓުގައި ތިން ކުލާހެއް ހިމެނެ އެވެ. އެއީ ބިޒްނަސް އަށް 18 ގޮނޑި އާއި ފްރިމިއަމް އެކޮނަމީއަށް 36 ގޮނޑި އާއި އިކޮނޮމީ ކުލާހުގައި 210 ގޮނޑި އެވެެ. ޖުމްލަ 264 މީހުންނަށް މި ބޯޓުގައި ދަތުރުކުރެވެ އެވެ.

މޯލްޑިވިއަންގެ އާ ބޯޓު ގެނައީ މި މަހުގެ ހަ ވަނަ ދުވަހު އެވެ. މި ބޯޓާއި އެކު ޗައިނާއިން ރާއްޖެއަށް އަންނަ ޓޫރިސްޓުންގެ އަދަދު ވަރަށް ބޮޑުތަނުން އިތުރުކުރެވޭނެ ކަމަށް އެ އެއާލައިނުން ބުނެފައިވެ އެވެ.