ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ކުރީގެ ރައީސް ބައްސާމް އަދީލް ޖަލީލުގެ ހިޔާނާތުގެ މައްސަލައިގައި ދެވަނަ ގާނޫނީ ވަކީލުވެސް މައްސަލައިން ތަނާޒުލްވެއްޖެ އެވެ.
މައްސަލަ ބައްލަވާ ގާޒީ ވިދާޅުވި ގޮތުގައި، ބައްސާމް ފަހުން އައްޔަނުކުރި ވަކީލުވެސް މައްސަލައިން ތަނާޒުލްވެފައިވާ ކަމަށް މިއަދު ސިޓީއަކުން ކޯޓަށް އަންގާފައިވެއެވެ. މީގެ ކުރިން ބައްސާމްގެ ފުރަތަމަ ވަކީލު ވެސް ވަނީ މައްސަލައިން ތަނާޒުލްވެފައެވެ.
ބައްސާމްގެ މައްޗަށް މަނީ ލޯންޑްރިން އާއި ހިޔާނާތްތެރިވުމުގެ ހަތަރު ދައުވާ އުފުލާފައިވާއިރު، ކްރިމިނަލް ކޯޓުން ނިންމާފައިވަނީ މި ހަތަރު ދައުވާގެ ޝަރީއަތް އެކީގައި ކުރިއަށްގެންދާށެވެ.
Advertisement
މިއަދުގެ އަޑުއެހުމުގައި، ބައްސާމް ވިދާޅުވެފައިވަނީ ޝަރީއަތުގައި ކުރިއަށްގެންދަން ބޭނުންވަނީ ވަކީލަކާއެކު ކަމަށެވެ. އެހެންކަމުން ގާޒީ ވަނީ އައު ވަކީލަކު އައްޔަނުކުރަން ބައްސާމަށް 10 ދުވަހުގެ މުއްދަތެއް ދެއްވާފައެވެ. އަދި މި މަހުގެ 30 ވަނަ ދުވަހަށް އިތުރު އަޑުއެހުމެއް ތާވަލުކޮށްފައިވެއެވެ.
ގާޒީ އިތުރަށް ވިދާޅުވެފައިވަނީ، އެ އަޑުއެހުމާއި ހަމައަށް ވަކީލަކު އައްޔަން ނުކުރެވޭނެ ނަމަ، ދައުވާތަކަށް އަމިއްލައަށް ޖަވާބުދާރީވާން ޖެހޭނެ ކަމަށެވެ.
ބައްސާމްގެ މައްޗަށް ކުރެވިފައިވާ ތުހުމަތުތަކުގެ ތެރޭގައި، ފީފާއިން ފޮނުވި ފައިސާއަށް ހިޔާނާތްތެރިވުމާއި، މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ނެގުން ހިމެނެއެވެ. މި މައްސަލައިގައި ފީފާއިން ވަނީ ބައްސާމް ނުވަ މަސް ދުވަހަށް ސަސްޕެންޑް ކޮށްފައެވެ.
