ރާއްޖެއަށް މި ހަފުތާގައި މޫސުން ވަރަށް ގޯސްވާނެ ކަމަށް ލަފާކޮށްފައި ވާތީ، ވިއްސާރާގައި ލިބިދާނެ ގެއްލުންތަކުން ރައްކާތެރިވުމަށް ކަމާ ބެހޭ އިދާރާތައް ގުޅިގެން ޖޮއިންޓް އޮޕަރޭޝަނެއް މިއަދު ފަށައިފިއެވެ.
މި ޖޮއިންޓް އޮޕަރޭޝަނަކީ ވިއްސާރާގައި ލިބޭ ގެއްލުންތައް ކުޑަކުރުމުގެ ގޮތުން، ސީދާ ރައީސް ޑރ. މުޙައްމަދު މުޢިއްޒުގެ އިސްނެންގެވުމުގެ މަތިން މުޅި ރާއްޖޭގައި ފެށި އޮޕަރޭޝަނެކެވެ.
މި ޖޮއިންޓް އޮޕަރޭޝަނުގެ ކަންކަން ކުރިއަށް ގެންދަނީ ފުލުހުންނާއި ސިފައިންނާއި އެންޑީއެމްއޭ ގުޅިގެންނެވެ.
ރާއްޖެ ސަރަޙައްދުގައި މި ވަގުތު އުފެދިފައިވާ ކޮޅިގަނޑު ހަ ދުވަހަށް ދެމިގެންދާނެ ކަމަށް މެޓް އޮފީހުން ލަފާކޮށްފައިވެއެވެ. މި ކޮޅިގަނޑުގެ ސަބަބުން އާންމުކޮށް ވައި ގަދަވެ، ކަނޑުތައް ވެސް ގަދަވާނެ ކަމަށާއި އުތުރާއި މެދު ރާއްޖެތެރޭގެ ބައެއް ރަށްތަކަށް އުދައެރުން ވެސް އެކަށީގެންވާ ކަމަށް އެ އިދާރާއިން ބުންޏެވެ.
މި މަހު ކުރީކޮޅު ވެސް ރާއްޖެއަށް ވަރަށް ބޮޑަށް މޫސުން ގޯސްވިއެވެ. އެ ފަހަރު ވިއްސާރާގައި މާލެ އާއި ރަށްރަށުގައި ވަރަށް ބޮޑަށް ފެންބޮޑުވެ، ބޮޑެތި ގެއްލުންތައް ލިބުނެވެ.
