މާލޭގެ މާފަންނު ސަހަރާގައި ހުރި ސްޓޯމް ވޯޓަރ ޕަންޕް ސްޓޭޝަނަށް ލިބުނު ގެއްލުން މަރާމާތުކޮށްފި ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބުނެފިއެވެ.

އާރްޑީސީން ކުރި އެކްސް ޕޯސްޓުގައި ބުނެފައިވާ ގޮތުގައި، މި މަސައްކަތް ކޮށްފައިވަނީ އާރްޑީސީއާއި، މާލެ ސިޓީ ކައުންސިލް އަދި ސްޓެލްކޯ ގުޅިގެންނެވެ. މި ޕަންޕް ސްޓޭޝަނަށް ގެއްލުން ލިބުނީ މާލެ ސިޓީ ކައުންސިލުން މާފަންނު ސަހަރާ ކޮނުމުގެ މަސައްކަތް ކުރިއިރު ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތޮލިބު ވިދާޅުވެފައިވެއެވެ.

މިނިސްޓަރު މުއްތޮލިބު "އެކްސް" ގައި ކުރެއްވި ޕޯސްޓެއްގައި ވިދާޅުވެފައިވަނީ، ސިޓީ ކައުންސިލާއި އެ މަސައްކަތް ކުރި ކުންފުނިން ވެސް އެކަން ކޮށްފައިވަނީ ވަރަށް ޒިންމާދާރުކަން ކުޑަކޮށް ކަމަށެވެ. އަދި މި މަސައްކަތް ކުރިއިރު، މާލޭ ހުޅަނގު އުތުރު ސަރަހައްދުތަކުން ފެން ހިންދަން ބޭނުންކުރާ ސްޓޯމް ވޯޓާ ޕަމްޕުގެ ބައެއް ނަގާފައިވާ ކަމަށާއި އެކަން މިނިސްޓްރީއަށް އަންގާފައި ނުވާ ކަމަށް ވެސް އެމަނިކުފާނު ވިދާޅުވިއެވެ.

މާފަންނު ސަހަރާ ސަރަހައްދަކީ ވާރޭ ވެހިގެން މާލޭގައި އެންމެ ބޮޑަށް ފެންބޮޑުވާ އެއް ސަރަހައްދެވެ. ސިޓީ ކައުންސިލުން ދާދި ފަހުން އެ ސަރަހައްދުގައި ޕާކިން ޒޯނެއް ހެދުމަށް އެ ތަން ހުސްކުރުމުގެ މަސައްކަތް ކުރުމާއި ގުޅިގެން، މިދިޔަ ހަފްތާގައާއި ރޭ މެންދަމު ވެސް އެ ސަރަހައްދުގައި ވަނީ ފެންބޮޑުވެފައެވެ.