ބުރާސްފަތި ދުވަހު ބަހާމާސްގެ "ކްރިސްޓަލް ސިމްފޮނީ" ނަމަކަށް ކިޔާ ކުރޫޒް ޝިޕެއް 212 ފަތުރުވެރިންނާއެކު މާލެއަށް ބަނދަރުކޮށްފިއެވެ.
މި ކުރޫޒް ޝިޕަކީ މި ސީޒަންގައި މާލެއަށް ބަނދަރުކުރި ހަތަރުވަނަ ކުރޫޒް ޝިޕެވެ. މި ބޯޓު ރާއްޖެ އައިސްފައިވަނީ ސީޝެލްސްއިން ކަމަށް ވާއިރު ދެން ދާނީ ސްރީ ލަންކާއަށެވެ.
މިދިޔަ މަހުގެ 30 ވަނަ ދުވަހުވެސް ސީޝެލްސްއިން ދެ ކުރޫޒް ޝިޕެއް ރާއްޖެ އައިސްފައި ވެއެވެ. މި ދެ ކުރޫޒް ޝިޕްގައި 3000 އަށްވުރެ ގިނަ ފަތުރުވެރިން ރާއްޖެ އައެވެ.
ރާއްޖޭގެ ފަތުރުވެރިކަމުގެ ސީޒަން ނިމުމުގެ ކުރިން އިތުރު 12 ކުރޫޒް ޝިޕް ރާއްޖެ އައުމަށް ތާވަލުކުރެވިފައިވާ ކަމަށް މާޔާއިން ބުނެފައިވެއެވެ.
ކުރޫޒް ޝިޕްތަކުގެ މެދުގައި ރާއްޖޭގެ މަޤްބޫލުކަން އިތުރުވަމުންދާއިރު، ރާއްޖެއަށް އަންނަ ފަތުރުވެރިންގެ އަދަދަށް ވެސް ބޮޑު ކުރިއެރުމެއް ލިބިފައިވެއެވެ. ފަތުރުވެރިކަމާބެހޭ ވުޒާރާގެ ތަފާސްހިސާބުތައް ދައްކާގޮތުން އަހަރުގެ ފުރަތަމަ 7 ދުވަހުގެ ތެރޭގައި ރާއްޖެއަށް 43،000 އަށްވުރެ ގިނަ ފަތުރުވެރިން އައިސްފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 9.7 އިންސައްތައިގެ އިތުރުވުމެކެވެ.
