އަލް-ހިޖްރަ ޓްރެވަލް އެންޑް ޓްއާރސް ޕްރައިވެޓް ލިމިޓެޑުގެ ފަރާތުން ބަޔަކު އުމްރާއަށް ގެންގޮސް ހާލުގައި ޖެއްސި މައްސަލާގައި އެ ކުންފުނި އެއް ލައްކަ ރުފިޔާއިން ޖޫރިމަނާކޮށް އިތުރު ފިޔަވަޅުތައް އިސްލާމިކް މިނިސްޓްރީން މިއަދު އަޅައިފި އެވެ.

އިސްލާމިކް މިނިސްޓްޜީން މީޑިއާތަކަށް ފޮނުވި މެސެޖެއްގައި ބުނީ އަލް-ހިޖްރަ ކުންފުނީގެ ފަރާތުން މިދިޔަ މަހު އުމްރާ ދަތުރުގައި ދިއުމަށް ހަމަޖެހިފައިވާ ޢުމްރާވެރިން ދަތުރަށް ފައިސާ ދައްކާފައި ވީ ނަމަވެސް އެ ފައިސާއިން އުމްރާވެރިންގެ ދެކޮޅު ޓިކެޓު ހަމަނުޖައްސައި، އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާ ކަމަށް އެ ކުންފުނިން އިއުތިރާފުވެފައިވާ ކަމަށެވެ.

މައްކާއިން ރާއްޖެ އައުމަށް ޓިކެޓު ނަގާފައި ނެތުމުގެ ސަބަބުން ރާއްޖެ ނާދެވިގެން އެ އުމްރާވެރިން މިނިސްޓްރީގައި އެހީތެރިކަމަށް އެދިފައިވުމާ އެކު، ހާލުގައި ޖެހިފައި ތިބި 23 އުމްރާވެރިންނަށް މިއަދު މޯލްޑިވްސް ހައްޖު ކޯޕަރޭޝަން ލިމިޓެޑުގެ ބެލުމުގެ ދަށަށް ގެނެސްފައިވާ ކަމަށް ބުންޏެވެ.

މިނިސްޓްރީން ބުނި ގޮތުގައި، އެ ކުންފުނި ވަނީ ރާއްޖެއިން އުމްރާއަށް މީހުން ގެންދިޔުމާ ބެހޭ އުސޫލާ ހިލާފުވެފަ އެވެ. އެހެންވެ، އެ އުސޫލުގެ ދަށުން އެ ކުންފުންޏަށް ގިނަ ފިޔަވަޅުތައް އެޅުމަށް މިނިސްޓްރީ ވަނީ ނިންމައިފަ އެވެ.

އެ ކުންފުންޏަށް އެޅި ފިޔަވަޅުތަކަކީ؛

-ރާއްޖެއިން އުމްރާއަށް މީހުން ގެންދިއުމަށް މިނިސްޓްރީން އެ ކުންފުންޏަށް ދޫކޮށްފައިވާ ހުއްދަ ހިފެހެއްޓުން.

-100،000ރ. އިން އެ ކުންފުނި ޖޫރިމަނާކުރުން.

-އެ ކުންފުންޏަށްއަދި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިޔުމުގެ ހުއްދަ ނުދިނުން.

-އެ ކުންފުނީގެ ފަރާތުން އުމްރާއަށް ގެންގޮސް ހާލުގައި ޖެހުނު މީހުން ރާއްޖެ ގެނައުމަށް މިނިސްޓްރީން ކުރާ ހަރަދު އެ ކުންފުނިން ހޯދުން.

-މި މައްސަލަ ތަހުގީގުކޮށް ގާނޫނީ ފިޔަވަޅު އެޅުމަށް ޕޮލިހަށް ހުށަހެޅުން.

"އިސްވެދިޔަ ފިޔަވަޅުތައް ތަންފީޒުކުރުމަށްޓަކައި މިނިސްޓްރީ އޮފް އިސްލާމިކް އެފެއާޒްއިން އިދާރީ ގޮތުންނާއި ގާނޫނީ ގޮތުން ކުރަން ޖެހޭ އެންމެހާ ކަންކަން ފަސްޖެހުމެއް ނެތި ކުރާނެކަމުގެ ޔަގީންކަން ދިވެހި ލޮބުވެތި ރައްޔިތުންނަށް އަރުވަމެވެ،" މިނިސްޓްރީން ބުންޏެވެ.