މާލެއަށް މިދިޔަ ހުކުރު ދުވަހު ކުރި ގަދަ ވިއްސާރާގައި ގެތަކަށް ވެފައިވާ ގެއްލުން 2.2 މިލިއަން ރުފިޔާއަށް އަރާ ކަމަށާއި މިއީ މިހާތަނަށް ވިއްސާރާގައި މާލެއަށް ގެއްލުން އެންމެ ބޮޑުވި ފަހަރު ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފިއެވެ.
ފެންބޮޑުވުމާ ގުޅިގެން ލިބުނު ގެއްލުންތަކުގެ އެސެސްމަންޓް ހެދުމަށް ފަހު އެންޑީއެމްއޭ އިން ނެރުނު ބަޔާނެއްގައި ބުނީ މާލެއިން 145 ގެއަކަށް ގެއްލުންވި ކަމަށެވެ. އޭގެ ތެރެއިން 115 ގެއެއްގެ އެސެސްމަންޓް ވަނީ ހަދާފައެވެ.
އެކަމަކު 13 ގެއަކުން އެސެސްމަންޓް ހަދަން ބޭނުން ނުވާތީ އެ ގެތަކުގެ އެސެސްމަންޓެއް ނުހަދައެވެ. ވެރިފަރާތަށް ނުގުޅިގެންނާއި ގެއަށް ނުވަދެވިގެން އަދި އިތުރު ސަބަބުތަކާ ހުރެ 17 ތަނެއްގެ އެސެސްމަންޓް ނުހެދޭ ކަމަށް އެންޑީއެމްއޭ އިން ބުންޏެވެ.
މާލެއަށް ހުއްޓާނުލައި ވެހުނު ބޯ ވާރޭގައި މުޅި މާލޭގައި ފެންބޮޑުވެ، ހިފައިގެންގުޅޭ ސާމާނާއި އުޅަނދުތަކަށް ވެސް ވަރަށް ބޮޑަށް ގެއްލުންވިއެވެ.
ފެންބޮޑުވުމުގެ ޙާދިސާގައި ދެ މިލިއަނަށް ވުރެ ބޮޑު ގެއްލުމެއް ލިބުނުއިރު އޭގެ ތެރޭގައި ވިޔަފާރިކުރާ ތަންތަނާއި ގުދަން ފަދަ ތަންތަނަށް ލިބުނު ގެއްލުން ނުހިމެނޭ ކަމަށް އެންޑީއެމްއޭ އިން ބުންޏެވެ.
"މިއީ މާލެއަށް ބޯކޮށް ވާރޭ ވެހިގެން މިހާތަނަށް ހިންގުނު އެންމެ ބޮޑު އޮޕަރޭޝަން އަދި އެންމެ ބޮޑު ގެއްލުމެއްވެ، އެންމެ ގިނައިން މީހުން ރައްކާތެރި ތަންތަނަށް ބަދަލުކުރަންޖެހުނު ފަހަރު." އެންޑީއެމްއޭގެ ބަޔާނުގައި ބުންޏެވެ.
އެންޑީއެމްއޭ އިން ބުނީ ފެންބޮޑުވުމުގެ އޮޕަރޭޝަނަށް 61،000ރ. ޚަރަދުވި ކަމަށެވެ. ރިލީފްގެ ގޮތުގައި، ހާލުގައި ޖެހުނު ފަރާތްތަކަށް ވަގުތީ ބޯހިޔާވަހިކަމާއި ކެއުން ބުއިމަށް 200،000ރ. ގެ އެހީތެރިކަން ފޯރުކޮށްދިން ކަމަށް ވެސް އެންޑީއެމްއޭއިން ބުންޏެވެ.
