ދެކުނު ކޮރެޔާގެ ކޯޓަކުން އިއްޔެ ވަނީ އެ ޤައުމުގެ ރައީސް ޔޫން ސުކް ޔޯލް ހައްޔަރުކުރުމަށް އައު އަމުރެއް ނެރެފައެވެ. މިއީ މިދިޔަ ހަފުތާގައި ނެރުނު ފުރަތަމަ އަމުރު ތަންފީޒު ނުކުރެވުމާއި ގުޅިގެން ތަޙުޤީޤީ ޓީމުގެ އެދުމުގެ މަތިން ނެރުނު އަމުރެކެވެ.

ފުރަތަމަ އަމުރު ތަންފީޒު ނުކުރެވުނީ ޔޫންގެ ހަށިފާރަވެރިންނާއި އަސްކަރިއްޔާގެ ސިފައިން ހުރަސްއެޅުމުންނެވެ. ދެކުނު ކޮރެޔާގެ ކޮރަޕްޝަންގެ މައްސަލަތައް ތަޙުޤީޤުކުރާ އިދާރާ (ސީއައިއޯ) އިން ބުނެފައިވަނީ ރިޔާސީ ގަނޑުވަރަށް ވަދެ ޔޫން ހައްޔަރުކުރުމަށް ކުރަންޖެހޭ ހުރިހާ ކަމެއް ކުރާނެ ކަމަށެވެ.

އައު އަމުރު ނެރުމާއި ގުޅިގެން ރިޔާސީ ގަނޑުވަރު ވަށައިގެން އިތުރު ބެރިކޭޑުތަކާއި ކަށިނަރު ޖަހައި، ސަލާމަތީ ފިޔަވަޅުތައް ވަނީ އިތުރަށް ހަރުދަނާކޮށްފައެވެ. ދިފާޢީ ވުޒާރާއިން ބުނެފައިވަނީ ރިޔާސީ ގަނޑުވަރުގައި ތިބި ސިފައިންނަކީ ޔޫންގެ ހަށިފާރަވެރިންގެ އަމުރު ހިނގާ ބައެއް ކަމަށެވެ.

މިއީ ދެކުނު ކޮރެޔާގެ ތާރީޚުގައި ވެރިކަމުގައި ހުރި ރައީސަކު ހައްޔަރުކުރުމަށް އަމުރެއް ނެރުނު ފުރަތަމަ ފަހަރެވެ. ޔޫން ހައްޔަރުކުރުމަށް އެދުނީ އޭނާ ސީއައިއޯގެ ތަޙުޤީޤަށް ޖަވާބުދާރީވުމަށް އިންކާރުކުރުމާއި ގުޅިގެންނެވެ.

ސީއައިއޯއިން ތުހުމަތުކުރަނީ ޑިސެންބަރު 3 ވަނަ ދުވަހު ޔޫން ކުއްލި ޙާލަތު އިޢުލާނުކުރީ ޤާނޫނީ ބާރުވެރިކަން ނެތިކޮށްލުމުގެ ނިޔަތުގައި ކަމަށެވެ. އެ ކަމާއި ގުޅޭ ތަޙުޤީޤެއް މިހާރު ދަނީ ކުރަމުންނެވެ.

ޔޫންގެ މައްޗަށް ދުސްތޫރީ ކޯޓުން ޝަރީޢަތް ހިންގަމުންދާއިރު، އޭނާ ވެރިކަމުން ދުރުކުރުމާމެދު ގޮތެއް ނިންމާނީ އެ ކޯޓުންނެވެ. ޔޫންގެ މައްސަލަ އަވަސްނިޔާގެ އުސޫލުން ހިންގުމަށް ކޯޓުން ވަނީ ނިންމާފައެވެ.