ވައިގެ ދަތުރުފަތުރުގެ ނިޒާމުގެ ތެރޭގައި ހިނގާ ހާދިސާތައް ތަހުޤީޤުކުރަން ވަކި އިދާރާއެއް އުފެއްދުމަށް މަސައްކަތް ކުރަމުންދާކަމަށް ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.

ދައުލަތުގެ މީޑިއާގައި ވާހަކަފުޅު ދައްކަވަމުން ވަޒީރު ވިދާޅުވީ ރާއްޖޭގެ ވައިގެ ދަތުރުފަތުރުގެ ސަލާމަތީ މިންގަނޑު މިހާރަށް ވުރެ ރަނގަޅު ކުރަންޖެހޭ ކަމަށެވެ. އެގޮތުން، ކުރިއަށް އޮތް ޖޫން މަހު އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އިން ރާއްޖޭގެ ސޭފްޓީ އޮޑިޓެއް ކުރަން ނިންމާފައިވާ ކަމަށާއި، މި އޮޑިޓުގެ ނަތީޖާ ކުރީގެ އޮޑިޓްތަކަށްވުރެ ރަނގަޅުކުރުމަށް މިހާރު ވެސް މަސައްކަތް ފަށާފައިވާ ކަމަށް ވަޒީރު ވިދާޅުވިއެވެ.

"އެންމެ މުހިންމުކޮށް ކުރަންޖެހޭ ކަމަކީ، އެއަރކްރާފްޓް އެކްސިޑެންޓް އިންވެސްޓިގޭޝަންސް، އެއީ މިހާރު ސިވިލް އޭވިއޭޝަނުން ބޭރުކޮށްފައި އިތުރު ބޮޑީއެއް އުފެއްދުން. އެއީ އެހެން ޤައުމުތަކުގައި ވެސް އެކަން އޮންނަ ގޮތް. އައިކާއޯ މެންޑޭޓް ކުރޭ. އިރާދަކުރެއްވިއްޔާ މި ޖެނުއަރީ ނިމޭ ހިސާބަށް، ކެބިނެޓަށް ހުށަހަޅައިގެން އެކަން ކުރެވޭތޯ މިބަލަނީ. މިކަން ކުރެވޭނީ ރައީސުލްޖުމްހޫރިއްޔާގެ ޤަރާރަކުން" ވަޒީރު ވިދާޅުވިއެވެ.

މީގެ އިތުރުން، ވައިގެ ދަތުރުފަތުރުގެ ދާއިރާ ހަރުދަނާކުރަން ގެންނަން ޖެހޭ ޤާނޫނީ ބަދަލުތައް ގެނައުމަށް، އެޓަރނީ ޖެނެރަލްގެ އޮފީހަށް މިހާރު ފޮނުވާފައިވާ ކަމަށާއި، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދުފުޅާއި އެއްގޮތަށް ސިވިލް އޭވިއޭޝަން އޮތޯރިޓީ އަކީ އޮޕަރޭޓަރުންނާއި ގާތުން މަސައްކަތް ކުރާ ތަނަކަށް ހައްދަވާނެ ކަމަށް ވެސް ވަޒީރު ވިދާޅުވިއެވެ.

ރާއްޖޭގައި މިހާރު 19 އެއަރޕޯޓެއް ތަރައްޤީކޮށް ބޭނުންކުރަމުން އަންނައިރު، އިތުރު އެއަރޕޯޓުތަކުގެ މަސައްކަތް ކުރަމުންދާކަމާއި، ފަތުރުވެރިކަމުގެ ދާއިރާގައި ގިނަ އަދަދެއްގެ ސީޕްލޭން ވެސް ބޭނުން ކުރަމުންދާކަން ވަޒީރު ފާހަގަކުރެއްވިއެވެ.