މާލެ، ގ. އުފުރިޔާގޭގެ ރޭ ހިނގި އަލިފާނުގެ ހާދިސާގައި ލިބުނު ގެއްލުމުގެ ސަބަބުން އެ ގޭގައި ދިރިއުޅުނު މީހަކަށް ވަގުތީ ބޯހިޔާވަހިކަން ހަމަޖައްސައިދީފި އެވެ.
އެންޑީއެމްއޭ އިން މިއަދު އެކްސްގައި ކުރި ޕޯސްޓެއްގައި ބުނީ ގ. އުފުރިޔާގޭގެ އެޕާޓްމަންޓެއްގައި ހިނގި އަލިފާނުގެ ހާދިސާއާ ގުޅިގެން އެ އެޕާޓްމަންޓުގައި ދިރިއުޅުނު މީހުންގެ ތެރެއިން އެހީތެރިކަން ބޭނުންވި އެކަކަށް އެއް ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމު ހަމަޖައްސައިދީފައިވާ ކަމަށެވެ.
އެ ގޭގެ ހަވަނަ ފްލޯގައި އަލިފާނުގެ ހާދިސާއެއް ހިނގީ ރޭ 11:30 ހާއިރެވެ. ރޯވި އަލިފާންގަނޑު އެމްއެންޑީއެފްގެ ފަޔާމަނުން ނިއްވާލީ ރޭ 12 ޖެހި ފަހުންނެވެ.
އެމްއެންޑީއެފުން ބުނި ގޮތުގައި، ގަލޮޅު ވީބީ ކުރިމަތިން އަދި ގަލޮޅުގައި އިހުސާން ފިހާރަ ވެސް ހުންނަ ނުވަ ބުރީގެ އެ އިމާރާތުގެ ހަވަނަ ފްލޯގެ "އެޕާޓްމަންޓް ބީ"ގައި ރޯވެ، އެއް ކޮޓަރި ވަނީ ބޭނުން ނުކުރެވޭ ވަރަށް އަނދައި ހުލިވެފަ އެވެ.
މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައެއް ނުވެ އެވެ.
ނަމަވެސް ދުމުގެ އަސަރުކޮށްގެން އުމުރުން ދުވަސްވީ މީހަކު ހޮސްޕިޓަލަށް ގެންދިޔަ ކަމަށް ފުލުހުން ބުންޏެވެ.
