ޔޫއޭއީ އާއި ރާއްޖޭގެ ގުޅުން އިތުރަށް ވަރުގަދަކުރުމާ ގުޅޭ ގޮތުން ދެ ގައުމުން އިއްޔެ މަޝްވަރާކޮށްފި އެވެ.
ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ ފޮރިން މިނިސްޓަރު އަބްދުالله ހަލީލް، ޔޫއޭއީގެ ޑެޕިއުޓީ ޕްރައިމް މިނިސްޓަރު އަދި ފޮރިން މިނިސްޓަރު ޝެއިހް އަބްދުالله ބިން ޒައިދު އަލް ނަހްޔާންއާ ބައްދަލުކުރައްވާފައިވާ ކަމަށެވެ.
ހަލީލް މި ވަގުތު ހުންނެވީ ރަސްމީ ދަތުރެއްގައި ޔޫއޭއީގަ އެވެ.
އެ ބައްދަލުކުރެއްވުމުގައި ހަލީލް ވަނީ ރައީސް ޑރ. މުޙައްމަދު މުޢިއްޒުގެ ފަރާތްޕުޅުން ޔޫއޭއީގެ ރައީސް ޝައިޚް މުޙައްމަދު ބިން ޒައިދު އަލް ނަހްޔާނަށް ތަހުނިޔާ އަރިސްކުރައްވައިފަ އެވެ. އަދި ރާއްޖޭގެ ތަރައްގީއަށާއި ކުރިއެރުމަށް އެ ގައުމުން ދޭ އެހީތެރިކަމަށް ޝުކުރު އަދާކުރައްވައި. ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމާ ބެހޭ ގޮތުން ދެ ބޭފުޅުން މަޝްވަރާކުރެއްވި ކަމަށް ވެސް ފޮރިން މިނިސްޓްރީން ބުންޏެވެ.
ދެ ގައުމުން އިސްކަންދޭ ދާއިރާތައް ހޯދައި އެ ކަންކަން ކުރިއަށް ގެންދިއުމުގައި އެއްބާރުލުން ދިނުމުގެ ޔަގީންކަމާއި ދެ ގައުމުގެ ދެމެދު އޮންނަ ޒަމާންވީ ގުޅުން އިތުރަށް ބަދަހިކުރުމަށް މަސައްކަތްކުރައްވާނެ ކަމުގެ ޔަގީންކަން ދެބޭފުޅުން އެރުވި ކަމަށް ވެސް މިނިސްޓްރީން ބުންޏެވެ.
"މި ބައްދަލުކުރެއްވުމުގައި، ދިވެހިރާއްޖޭގެ ފިސްކަލް ރިފޯމް އެޖެންޑާ އާއި ތަރައްގީގެ މުހިންމު މަސައްކަތްތަކާ ބެހޭ ގޮތުން މިނިސްޓަރު ޑރ. ހަލީލް މައުލޫމާތު ހިއްސާކުރެއްވި އެވެ. ޔޫއޭއީގެ އަބޫދާބީ ފަންޑް ފޯ ޑިވެލޮޕްމަންޓް (އޭޑީއެފްޑީ) މެދުވެރިކޮށް ދިވެހިރާއްޖެއަށް ފޯރުކޮށްދެއްވާ އަގުހުރި އެހީތެރިކަމަށް، ހާއްސަކޮށް ވެލާނާ އިންޓަނޭޝަނަލް އެއާޕޯޓު ފުޅާކުރުމުގެ މަޝްރޫއަށް ދެއްވާ އެހީތެރިކަމަށް މިނިސްޓަރު ހާއްސަ ޝުކުރެއް އަދާކުރެއްވި އެވެ،" ފޮރިން މިނިސްޓްރީން ބުންޏެވެ.
ހަލީލްގެ އަރިހުގައި، ރާއްޖެއިން ޔޫއޭއީއަށް ކަނޑައަޅާފައި ހުންނަ ސަފީރު މުހައްމަދު ހުސައިން ޝަރީފާއި އެމްބެސެޑާ އެޓް ލާޖް އަބްދުالله ޙަމީދާއި ޔޫއޭއީގައި ހުންނަ ރާއްޖޭގެ އެމްބަސީގެ ޑެޕިއުޓީ އެމްބެސެޑަރު ހައްސާން ވަހީދާއި ފޮރިން މިނިސްޓްރީގެ ޖޮއިންޓް ސެކްރެޓަރީ މަރްޔަމް ރީޝާ އަދި އެމްބަސީގެ ކައުންސެލަރު މޫމިނާ އިބްރާހީމް ވެސް ބައިވެރިވެވަޑައިގެންނެވި އެވެ.
