ޕޮލިސް އަންހެނަކަށް އަނިޔާކޮށް ރަހީނުކުރި މައްސަލައިގައި ފުލުހުންގެ ބެލުމުގެ ދަށުގައި ހުއްޓައި މަރުވި އާދަމް އަތުހަރު (32)ގެ މަރާއި ގުޅިގެން، އެމައްސަލަ ހިއުމަން ރައިޓްސް ކޮމިޝަން އޮފަ ދަ މޮލްޑިވްސް (އެޗްއާރްސީއެމް) އިން ތަޙްޤީޤް ކުރުމަށްފަހު ދެ ފުލުހެއްގެ މައްޗަށް ދަޢުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.

އާދަމް އަތުހަރު އަމިއްލައަށް މަރުވާން މަސައްކަތްކޮށްގެން ފަރުވާދެމުންދަނިކޮށް މަރުވީ 2024 ވަނަ އަހަރުގެ ސެޕްޓެމްބަރު 2 ވަނަ ދުވަހު އެވެ.

އެޗްއާރްސީއެމްގެ ސީނިއަރ މީޑިއާ އޮފިސަރ އަލީ ޒާޖިލް ޝަހީދު ވިދާޅުވި ގޮތުގައި، އަތުހަރުގެ މައްސަލައިގައި ހިމެނޭ ދެ ފުލުހެއްގެ މައްޗަށް ދަޢުވާކުރުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ވަނީ ފޮނުވާފައެވެ. ނަމަވެސް މި މައްސަލައާ ގުޅޭ އިތުރު ތަފްސީލު މިވަގުތު ހާމަކުރެވެން ނެތް ކަމަށް އޭނާ ވިދާޅުވިއެވެ.

އަތުހަރު ފުލުހުންގެ ބެލުމުގެ ދަށަށް ގެންދެވުނީ 2024 ވަނަ އަހަރުގެ އޯގަސްޓު 29 ވަނަ ދުވަހު އަންހެނެއްގެ ކަރުގައި ވަޅިޖައްސައި ރަހީނުކުރި މައްސަލައިގައެވެ. އޭނާ ހައްޔަރުކުރުމުގެ ތެރޭގައި ފުލުހުން މުގުރުން ތެޅުމުގެ ސަބަބުން އަތުހަރުގެ ބޮލަށް އަނިޔާވިއެވެ.

އަތުހަރު އަމިއްލައަށް މަރުވާން މަސައްކަތްކުރުމަށް ބޭނުންކުރީ އޭނާގެ ސޯޓުގައި އަޅުވާފައި އޮތް ނާޑުވާއެކެވެ.