ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އަތޮޅުތަކުގެ ރަށްރަށުގައި ކަރަންޓު ބިލުގައި ކުނި ބިލު ހިމެނުމަށް ނިންމި ނިންމުން ބާތިލުކޮށްފިއެވެ. މިކަން އިއުލާނުކުރީ ވެމްކޯއިން ނެރުނު ދެންނެވުމެއްގައެވެ.

ވެމްކޯއިން ބުނީ، މިއަހަރުގެ ޖެނުއަރީ މަހުން ފެށިގެން އަތޮޅުތަކުގެ ރަށްރަށުގައި ފޯރުކޮށްދޭ ގޭބިސީތަކުން ކުނިނަގައި ދިނުމުގެ ޚިދުމަތުގެ ބިލު، ޔޫޓިލިޓީ އެހެން ޚިދުމަތެއްގެ ބިލުގައި ހިމެނުމަށް ނިންމި ނިންމުން ބާތިލުކޮށްފައިވާ ކަމަށެވެ. މި ނިންމުން ބާތިލުކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލަފާފުޅުގެ މަތިން ކަމަށް އެ ކޯޕަރޭޝަނުން ބުންޏެވެ.

މި ބަދަލާއި ގުޅިގެން، ވެމްކޯގެ ޚިދުމަތްތައް ފޯރުކޮށްދޭނީ އަދި ބިލުކުރާނީ ހަމައެކަނި ވެމްކޯގައި ރަޖިސްޓަރ ކޮށްފައިވާ ފަރާތްތަކަށް ކަމަށް އެ ކުންފުނިން ބުންޏެވެ. އަދި ފައިސާ ދެއްކުމުގެ އިންތިޒާމުތައް ރަށްރަށުގައި ހުންނަ ވެމްކޯގެ އޮފީސްތަކުގައި ހަމަޖެހިފައި ހުންނާނެ ކަމަށާއި، އަވަސްޕޭ ޕޯޓަލް މެދުވެރިކޮށް ވެސް ފައިސާ ދެއްކޭނެ ކަމަށް ވެމްކޯއިން ހާމަކުރިއެވެ.

ވެމްކޯއިން އިތުރަށް ބުނީ، ރައްޔިތުންގެ އަތުން ވީއެންމެ ކުޑަ އަގެއް ނަގައިގެން އަސާސީ ޚިދުމަތެއްގެ ގޮތުގައި ކުނި ނެގުމުގެ ޚިދުމަތް ދިނުމަށް އެ ކޯޕަރޭޝަނުން މާލީ ބޮޑު ބުރައެއް އުފުލަމުންދާ ކަމަށެވެ.

ސްޓެލްކޯގެ ކަރަންޓު ބިލުގައި ހިމަނައިގެން 2023 ވަނަ އަހަރުގެ އޭޕްރީލް މަހުން ފެށިގެން މާލެ ސަރަޙައްދުގައި އަންނަނީ ކުނި ބިލަށް ފައިސާ ދައްކަމުންނެވެ.