މޯލްޑިވިއަންގެ ފުރަތަމަ ވައިޑްބޮޑީ އެއަރކްރާފްޓް ކަމުގައިވާ އޭ-330 ބޯޓު ރާއްޖެ ގެނައުން ފާހަގަކުރުމަށް އަގުހުރި އިނާމުތަކާއެކު ފޮޓޯ އަދި ވީޑިއޯގްރަފީ މުބާރާތަކާއި ގިނަ އިނާމުތައް ހިމެނޭ ލަކީޑްރޯއެއް ބޭއްވުމަށް ހަމަޖެހިފައިވާ ކަމަށް މޯލްޑިވިއަނުން މިއަދު ހާމަކޮށްފިއެވެ.

މޯލްޑިވިއަންގެ ފުރަތަމަ ވައިޑްބޮޑީ އެއަރކްރާފްޓް ރާއްޖެ އަންނާނީ އަންނަ ހަފްތާގެ ހޯމަ ދުވަހުއެވެ. މި ޚިދުމަތް ފެށުން ފާހަގަކުރުމުގެ ރަސްމީ ޖަލްސާ އޮންނާނީ ޖެނުއަރީ 6 ވަނަ ދުވަހު ވެލާނާ އިންޓަނޭޝަނަލް އެއަރޕޯޓްގައެވެ. އަދި އެ ދުވަހުގެ ހަވީރު 5:00 އިން 5:30 އަށް މާލޭގެ އުސްފަސްގަނޑު ސަރަހައްދާއި ހުޅުމާލޭގެ އިރުމަތީ ގޮނޑުދޮށް ސަރަޙައްދުގައި ޚާއްޞަ އެއަރ ޝޯވއެއް ބޭއްވުމަށް ވެސް ވަނީ ހަމަޖެހިފައެވެ.

📸 Prepare your cameras for the skies! ✈️ Don’t miss this airshow! ✨ Join our photo & videography competition and capture the magic in the air. #MaldivianAero pic.twitter.com/cQsl9EuAA6

މި ހަރަކާތްތަކުގެ ތެރެއިން، އަގުބޮޑު އިނާމުތަކާއެކު ފޮޓޯ އަދި ވީޑިއޯ މުބާރާތެއް ބޭއްވުމަށް ވަނީ ހުޅުވާލާފައެވެ. މި މުބާރާތުގެ 1 ވަނަ އިނާމުގެ ގޮތުގައި ރާއްޖޭގެ 5 ތަރީގެ ރިސޯޓެއްގައި 2 ރޭ ހޭދަކުރުމުގެ ފުރުޞަތު ދެ މީހަކަށް ލިބޭނެއެވެ. 2 ވަނަ އިނާމުގެ ގޮތުގައި އިންޑިއާއަށް ދެކޮޅު ޓިކެޓު ދެމީހަކަށް އަދި 3 ވަނަ އިނާމުގެ ގޮތުގައި ރާއްޖޭގެ މަންޒިލަކަށް ދެ މީހަކަށް ދެކޮޅު ޓިކެޓު ދޭން ވަނީ ހަމަޖެހިފައެވެ.

މީގެ އިތުރުން، ޖެނުއަރީ 11 ވަނަ ދުވަހުގެ ހަވީރު ހުޅުމާލެ ސެންޓްރަލް ޕާކުގައި ޚާއްޞަ އާއިލީ ހަވީރެއް ބޭއްވުމަށް ވަނީ ހަމަޖެހިފައެވެ. މި ހަވީރުގައި އަގުބޮޑު އިނާމުތައް ހިމެނޭގޮތަށް 30 ލަކީޑްރޯއެއް ނަގާނެ ކަމަށް މޯލްޑިވިއަނުން ބުންޏެވެ. މި ލަކީޑްރޯގެ އިނާމުގެ ގޮތުގައި ބައިނަލްއަޤްވާމީ އަދި އެތެރޭގެ އުދުހުންތަކުގެ ޓިކެޓްތައް ހިމެނޭނެއެވެ.

މޯލްޑިވިއަންގެ އައު އޭ-330 ބޯޓަކީ 264 މީހުންގެ ޖާގައިގެ ބޯޓެކެވެ. މި ބޯޓު ރާއްޖެ ގެންނަ ދަތުރުގައި ބައިވެރިވާނީ ހަމައެކަނި ދިވެހިންކަމަށް މޯލްޑިވިއަންއިން މަޢުލޫމާތު ދީފައި ވެއެވެ. އަދި މި ބޯޓުގެ ދަތުރުތައް ފުރަތަމަ ފަށާނީ ޗައިނާގެ 3 މަންޒިލަކަށް ކަމަށް ވެސް އެ ކުންފުނިން ފާހަގަ ކުރިއެވެ.