ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން (ޕީސީބީ) އިން ސަރުކާރު ހިއްސާވާ ކުންފުނިތަކާއި ދައުލަތުގެ ކުންފުނިތަކުގެ ހިންގުން ހަރުދަނާކުރުމަށް މުހިންމު ނިންމުންތަކެއް ނިންމައިފިއެވެ. މި ނިންމުންތަކުގެ ތެރޭގައި ކުންފުނިތަކުން ލޯނު ނެގުމުގައި އަމަލުކުރާނެ ގޮތުގެ ގައިޑްލައިނެއް އެކުލަވާލުން ހިމެނެއެވެ.
މި އައު ގައިޑްލައިނުގެ ދަށުން، ކުންފުނިތަކުން ލޯނު ނެގުމުގެ ކުރިން ސަރުކާރުގެ ހުއްދަ ހޯދަންޖެހޭނެއެވެ. މި ހުއްދަ ދޭނީ ފިނޭންސް މިނިސްޓްރީންނެވެ. ލޯނު ނެގުމަށް ކުންފުނީގެ ބޯޑުން ފާސްކުރާތާ 5 ދުވަހުގެ ތެރޭގައި ޕީސީބީއަށް އެކަން އަންގަންޖެހޭނެއެވެ.
އޮނިގަނޑަށާއި މުސާރައިގެ އޮނިގަނޑަށް ބަދަލު ގެނައުމުގައިވެސް އައު އުސޫލުތަކެއް ވަނީ ތަޢާރަފުކޮށްފައެވެ. މިގޮތުން، މިފަދަ ބަދަލެއް ގެންނަން ބޭނުންވާނަމަ، ކުންފުނިން އެކަމާ ގުޅޭ އިޖުރާއާތުތައް ފުރިހަމަކޮށް ފިނޭންސް މިނިސްޓްރީގެ ހުއްދަ ހޯދަންޖެހޭނެއެވެ.
މީގެ އިތުރުން، ކުންފުނިތަކުން އިންވެސްޓްމަންޓްތައް ހެދުމުގެ ކުރިންނާއި މުވައްޒަފުންނަށް ބޯނަސް ނުވަތަ އިންސެންޓިވްތައް ދިނުމަށް ނިންމުމުގެ ކުރިންވެސް ފިނޭންސް މިނިސްޓްރީގެ ހުއްދަ ނަގަންޖެހޭނެއެވެ. މީގެ ތެރޭގައި ކުންފުނީގެ މެނޭޖްމަންޓަށް ދޭ އިނާޔަތްތަކާއި، ބޯނަސް އަދި އިންސެންޓިވްތައްވެސް ހިމެނެއެވެ.
ޕީސީބީން ވަނީ ސަރުކާރުން އަލަށް އުފައްދާ ކުންފުނިތައް ގިންތިކުރުމުގެ އުސޫލުތަކެއްވެސް ކަނޑައަޅާފައެވެ. މި އުސޫލުގެ ދަށުން، އައު ކުންފުނިތަކުގެ ބޯޑު މެންބަރުންނަށް ދޭ އިނާޔަތް ކަނޑައެޅުމުގެ އުސޫލުތައް ވެސް ވަނީ ބަޔާންކޮށްފައެވެ.
އަދި ޕީސީބީން ވަނީ ސަރުކާރު ހިއްސާވާ ކުންފުނިތަކުގެ ނަމޫނާ ހިންގުމުގެ ގަވާއިދެއްވެސް އެކުލަވާލާފައެވެ. މި ގަވާއިދަކީ ކުންފުނިތަކުގެ ހިންގުން އިތުރަށް ހަރުދަނާކޮށް، ކޯޕަރޭޓް ގަވަނަންސްގެ ހަމަތައް ނެގެހެއްޓުމަށްޓަކައި އެކުލަވާލާފައިވާ ނަމޫނާ ގަވާއިދެއްކަމަށް ޕީސީބީން ބުނެފައިވެއެވެ.
މި އައު އުސޫލުތަކާއި ގަވާއިދުތައް ތަޢާރަފުކުރުމުގެ މައިގަނޑު މަޤްޞަދަކީ ސަރުކާރު ހިއްސާވާ ކުންފުނިތަކާއި ދައުލަތުގެ ކުންފުނިތަކުގެ ހިންގުން އިތުރަށް ހަރުދަނާކޮށް، މާލީ އަދި އިދާރީ ގޮތުން ޒިންމާދާރު ގޮތެއްގައި އެ ކުންފުނިތައް ހިންގުން ކަށަވަރުކުރުމެވެ. މިގޮތުން، ލޯނު ނެގުމާއި، އޮނިގަނޑަށް ބަދަލު ގެނައުމާއި، އިންވެސްޓްމަންޓް ހެދުމާއި، މުވައްޒަފުންނަށް ބޯނަސް ދިނުން ފަދަ މުހިންމު ނިންމުންތައް ނިންމުމުގައި އިތުރު ބެލުމެއް ގެނެސް، ސަރުކާރުގެ ކަމާބެހޭ އިދާރާތަކުގެ ހުއްދަ ހޯދުން ލާޒިމުކޮށްފައިވެއެވެ.
