ބިދޭސީއަކަށް ވަޅިން ބިރުދައްކައި ފައިސާ ފޭރުނު ކަމަށް ތުހުމަތުކުރެވޭ މީހަކު ފުލުހުން ވަނީ ހައްޔަރުކޮށްފައެވެ. މި މައްސަލައިގައި ހައްޔަރުކޮށްފައިވަނީ ލ. މާވަށަށް ނިސްބަތްވާ 24 އަހަރުގެ ފިރިހެނެކެވެ.

އިއްޔެ ކްރިމިނަލް ކޯޓަށް ހާޒިރުށް ހާޒިރުކޮށް، މި މީހާގެ ބަންދާމެދު ގޮތެއް ނިންމުމަށް ބޭއްވުނު އަޑުއެހުމުގައި، ކޯޓުން ވަނީ އޭނާ 15 ދުވަހަށް ބަންދުގައި ބެހެއްޓުމަށް އަމުރުކޮށްފައެވެ. ކޯޓު އަމުރުގައިވާ ގޮތުން، ފުލުހުން ވަނީ މި މައްސަލައާ ގުޅޭ ހެއްކާއި ގަރީނާ ކޯޓަށް ހުށަހަޅާފައެވެ. އަދި މި މީހާ ބަންދުން ދޫކޮށްލައިފިނަމަ މުޖުތަމަޢުގެ ސަލާމަތަށް ނުރައްކާވެދާނެ ކަމަށް ކޯޓުން ވަނީ ކަނޑައަޅާފައެވެ.

ކޯޓުގައި މި މީހާ ބުނެފައިވަނީ، ފޭރުނު ކަމަށް ތުހުމަތުކުރެވޭ ފައިސާއަކީ ބިދޭސީ މީހާ އޭނާއަށް ދޭންޖެހޭ ފައިސާ ކަމަށެވެ. ނަމަވެސް، މި މައްސަލައިގައި ތުހުމަތުކުރެވޭ މީހާއަކީ ކުރިންވެސް ކުށުގެ ރެކޯޑްތަކެއް ހުރި މީހެއްކަން ފާހަގަކުރެވެއެވެ.

މި މައްސަލައިގެ ތަޙުޤީޤު ފުލުހުން ދަނީ ކުރިއަށް ގެންދަމުންނެވެ.