ދިވެހިރާއްޖޭގެ އަޑުން ވޭތުވެދިޔަ 62 އަހަރުގެ ތެރޭގައި ޖީލެއްގެ ފިކުރު ބިނާކޮށްފައިވާ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ވަޒީރު މިފަދައިން ވިދާޅުވެފައިވަނީ ދިވެހިރާއްޖޭގެ އަޑުގެ 62 ވަނަ އަހަރީ ދުވަހުގެ މުނާސަބަތުގައި ގެނެސްދިން ޚާއްސަ ކަވަރޭޖަށް ދެއްވި އިންޓަވިއުއެއްގައެވެ.
ވަޒީރު ވިދާޅުވީ ދިވެހިރާއްޖޭގެ އަޑުން ދީނުގެ އަޑު ރާއްޖޭގެ އެކި ކަންކޮޅުތަކުގައި ތިބި ރައްޔިތުންނާ ހަމައަށް ފޯރުކޮށްދިނުމުގައި މުހިންމު މަސައްކަތްތަކެއް ކޮށްފައިވާ ކަމަށެވެ. އަދި އިސްލާމީ ކަންތައްތަކާބެހޭ ވުޒާރާއާއި ދީނީ އިލްމުވެރިންނާ ގުޅިގެން ގިނަ މަސައްކަތްތަކެއް ކުރެވިފައިވާ ކަމަށްވެސް ވަޒީރު ފާހަގަކުރެއްވިއެވެ.
Advertisement
2025 ވަނަ އަހަރަކީ ރާއްޖޭގެ އިސްލާމީ ކަންތައްތަކަށް ވަރަށް ބޮޑު ދިރުމެއް ގެންނާނެ އަހަރެއްކަމަށް ވަޒީރު ވިދާޅުވިއެވެ. އެގޮތުން ނަމާދަށް ހޭލުންތެރިކުރުމުގެ ޚާއްސަ ޕްރޮގްރާމް ފަދަ މުހިންމު ޕްރޮގްރާމްތައް ރޭވިފައިވާ ކަމަށާއި، މި މަސައްކަތުގައި ދިވެހިރާއްޖޭގެ އަޑުން އިސް ދައުރެއް އަދާކުރާނެ ކަމަށްވެސް ވަޒީރު ފާހަގަކުރެއްވިއެވެ.
ޒުވާނުންގެ ދީނީ ހޭލުންތެރިކަން އިތުރުކުރުމަށް ދިވެހިރާއްޖޭގެ އަޑުން އިތުރު ޕްރޮގްރާމްތައް އުފައްދަން ޖެހޭކަމަށް ވަޒީރު ވިދާޅުވިއެވެ. އަދި ކުރިއަށް އޮތް ރަމަޟާން މަހުގައި ރަށްރަށުގައި ދިވެހިރާއްޖޭގެ އަޑު އަހާ މީހުންގެ ޢަދަދު އިތުރުވެގެންދާނެ ކަމަށްވެސް ވަޒީރު ލަފާކުރެއްވިއެވެ.
ވަޒީރު ޝަހީމް އަމިއްލަ ތަޖުރިބާ ޙިއްސާކުރައްވަމުން ވިދާޅުވީ، ކުޑައިރު ޤުރުއާން ކިޔަވަން ދަސްކުރެއްވީ ދިވެހިރާއްޖޭގެ އަޑުން ކަމަށެވެ. އަދި ދިވެހިރާއްޖޭގެ އަޑަކީ އެކި ގޮތްގޮތުން ޅައިރުގެ ގިނަ ހަނދާންތަކާ ގުޅިފައިވާ ބައިވެރިއެއްކަންވެސް ފާހަގަކުރެއްވިއެވެ.
މީގެ އިތުރުން، ދިވެހިރާއްޖޭގެ އަޑުން ފޯރުކޮށްދޭ މަޢުލޫމާތުގެ މުހިންމުކަން ފާހަގަކުރައްވައި، އަޑުގެ ޕްރޮގްރާމްތަކާއި މަޢުލޫމާތުގެ ޒަރީޢާއިން ގިނަ ބަޔަކަށް އެކި ކަންކަމަށް ލޯހުޅުވިގެން ދިޔަކަމަށް ވަޒީރު ވިދާޅުވިއެވެ.
ދިވެހިރާއްޖޭގެ އަޑުގެ 62 ވަނަ އަހަރީ ދުވަހާ ގުޅިގެން ވަޒީރު ދެއްވި މި އިންޓަވިއުގައި، ދީނީ ހޭލުންތެރިކަން އިތުރުކުރުމަށް ކުރާ މަސައްކަތްތައް މިހާރަށްވުރެވެސް ފުޅާކޮށް އިތުރުކުރުމަށް މަސައްކަތްކުރަން ޖެހޭކަން ފާހަގަކުރެއްވިއެވެ. އަދި ކުރިއަށް އޮތް ތަނުގައި ދިވެހިރާއްޖޭގެ އަޑާއި އިސްލާމީ ކަންތައްތަކާބެހޭ ވުޒާރާއާ ގުޅިގެން އިތުރު މަސައްކަތްތަކެއް ކުރިއަށް ގެންދާނެކަމުގެ އުއްމީދު ފާޅުކުރެއްވިއެވެ.
