ދެކުނު ކޮރެޔާގެ ޖޭޖޫ އެއަރގެ މަތިންދާބޯޓެއް މުއާން ބައިނަލްއަޤުވާމީ ވައިގެ ބަނދަރުގައި ޖެއްސުމުގެ ތެރެއިން އަލިފާން ރޯވެ، ހިނގި ޙާދިސާގައި މަރުވި މީހުންގެ ޢަދަދު 179 އަށް އަރައިފިއެވެ.
ދެކުނު ކޮރެޔާގެ ދަތުރުފަތުރާ ބެހޭ ވުޒާރާއިން ބުނެފައިވާ ގޮތުގައި މަތިންދާބޯޓުގައި ދަތުރުކުރި ދެ ފަޅުވެރިން ފިޔަވައި އެހެން ހުރިހާ ފަޅުވެރިންނާއި ފަސިންޖަރުން މަރުވެފައިވާ ކަމަށް ބެލެވެއެވެ.
މި ޙާދިސާ ހިނގީ ތައިލެންޑުގެ ބެންކޮކުން ފުރައިގެން ދެކުނު ކޮރެޔާގެ ދެކުނުގައި އޮތް މުއާނަށް ދަތުރުކުރަމުންދިޔަ ބޮއިންގ 800-737 މަރުކާގެ މަތިންދާބޯޓެއްގައެވެ. މަތިންދާބޯޓުގައި 175 ފަސިންޖަރުންނާއި ހަ ފަޅުވެރިން ތިބިކަމަށް ރިޕޯޓުތައް ބުނެއެވެ.
Advertisement
މުއާންގެ އަލިފާން ނިއްވާ އިދާރާގެ ވެރިޔާ ލީ ޗޮންގ-ޔަން ވިދާޅުވެފައިވަނީ ސަލާމަތްކުރެވިފައިވާ ދެ ފަޅުވެރިން ފެނިފައިވަނީ މަތިންދާބޯޓުގެ އެންމެ ފަހަތުން ކަމަށެވެ. އެ ދެ މީހުންނަށް ހޮސްޕިޓަލުގައި ދަނީ ފަރުވާ ދެމުންނެވެ.
މި ޙާދިސާ ހިނގަން މެދުވެރިވި ސަބަބު ދެނެގަތުމަށް މަސައްކަތް ފަށާފައިވާއިރު، އުދުހެމުން ދިޔަ ދޫނިތަކެއް މަތިންދާބޯޓުގައި ޖެހިފައިވާ ކަމަށް ބެލެވޭ ކަމަށް ލީ ވިދާޅުވެފައިވެއެވެ. އަދި މަތިންދާބޯޓުގެ ލޭންޑިންގ ގިޔަރަށް މައްސަލަތަކެއް ކުރިމަތިވީ އެ ސަބަބާ ގުޅިގެން ކަމަށް ބެލެވޭ ކަމަށްވެސް އޭނާ ވިދާޅުވިއެވެ.
ޖޭޖޫ އެއަރގެ ވެރިޔާ ކިމް އީ-ބަޔި ވަނީ މި ޙާދިސާގައި މަރުވި މީހުންގެ ޢާއިލާތަކަށް ތަޢުޒިޔާ ވިދާޅުވެ، މަޢާފަށް އެދިވަޑައިގެންފައެވެ. އަދި ތަޙުޤީޤަށް ފުރިހަމައަށް އެއްބާރުލުން ދެއްވާނެ ކަމަށްވެސް އޭނާ ވިދާޅުވެފައިވެއެވެ.
މިއީ ދެކުނު ކޮރެޔާގެ ތާރީޚުގައި ހިނގާފައިވާ އެންމެ ނުރައްކާތެރި ވައިގެ ޙާދިސާއެވެ. މި ހިތާމަވެރި ޙާދިސާއާ ގުޅިގެން، މަރުވެފައިވާ މީހުންގެ ހަށިތައް ދެނެގަތުމުގެ މަސައްކަތް މިހާރު ދަނީ ކުރަމުންނެވެ. ދެކުނު ކޮރެޔާގެ ދަތުރުފަތުރާ ބެހޭ ވުޒާރާގެ އޮފިޝަލުން ބުނެފައިވާ ގޮތުގައި މިހާތަނަށް ދެނެގަނެވިފައިވަނީ 22 މީހެއްގެ ހަށިގަނޑެވެ.
މި ޙާދިސާގައި މަރުވި މީހުންގެ ޢާއިލާގެ މެންބަރުން މި ވަގުތު އަންނަނީ މުއާން ވައިގެ ބަނދަރު ކައިރިއަށް ޖަމާވަމުންނެވެ. އަދި އެކި ހިސާބުތަކަށް ވިއްސިވިހާލިވެފައިވާ މީހުންގެ ހަށިތަކުގެ ބައިތައް ހޯދައި، ދެނެގަތުމުގެ މަސައްކަތްވެސް އަންނަނީ ކުރަމުންނެވެ.
ޖޭޖޫ އެއަރއަކީ 2005ވަނަ އަހަރު އުފެއްދި ބަޖެޓު އެއަރލައިނެކެވެ. އަދި ދެކުނު ކޮރެޔާގައި ތިންވަނައަށް އެންމެ ގިނަ ޢަދަދެއްގެ ފަސިންޖަރުން އުފުލާ އެއަރލައިނެވެ. މި ޙާދިސާ ހިނގާފައިވަނީ، ބެންކޮކާއި މުއާނާ ދެމެދު ސީދާ ދަތުރުތައް ފެށިތާ ތިން ހަފުތާއެއްހާ ދުވަސް ފަހުންނެވެ.
ދެކުނު ކޮރެޔާގެ އެއަރލައިނަކަށް މިފަދަ ހިތާމަވެރި ޙާދިސާއެއް އެންމެ ފަހުން ކުރިމަތިވެފައިވަނީ 1997 ވަނަ އަހަރުއެވެ. އެ އަހަރު، ކޮރެޔަން އެއަރގެ މަތިންދާބޯޓެއް ވެއްޓި 200 އަށްވުރެ ގިނަ މީހުން މަރުވިއެވެ. އަދި ދެކުނު ކޮރެޔާގެ ފަސްގަނޑުގައި ހިނގި މިފަދަ އެހެން ޙާދިސާއެއްގައި އެއަރ ޗައިނާގެ މަތިންދާބޯޓެއް ވެއްޓި 129 މީހުން މަރުވިއެވެ.
މި ޙާދިސާއާ ގުޅިގެން ދެކުނު ކޮރެޔާގެ ސަރުކާރުން ވަނީ ފުޅާ ދާއިރާއެއްގައި ތަޙުޤީޤެއް ހިންގުމަށް ނިންމާފައެވެ. އަދި މުސްތަޤުބަލުގައި މިފަދަ ޙާދިސާތައް ތަކުރާރުވިޔަ ނުދިނުމަށްޓަކައި އަޅަންޖެހޭ ފިޔަވަޅުތައް އަޅާނެ ކަމަށްވެސް ސަރުކާރުން ބުނެފައިވެއެވެ.
މި ހިތާމަވެރި ޙާދިސާއާ ގުޅިގެން ދުނިޔޭގެ އެކި ޤައުމުތަކުގެ ވެރިން ވަނީ ދެކުނު ކޮރެޔާގެ ސަރުކާރަށާއި މަރުހޫމުންގެ ޢާއިލާތަކަށް ތަޢުޒިޔާ ފޮނުވާފައެވެ. އަދި ބައިނަލްއަޤުވާމީ ވައިގެ ދަތުރުފަތުރުގެ ޖަމްޢިއްޔާތަކުންވެސް ވަނީ މި ޙާދިސާއާ ގުޅިގެން ކަންބޮޑުވުން ފާޅުކޮށްފައެވެ.
