ދިވެހިރާއްޖޭގެ ޤައުމީ އެއާލައިން، މޯލްޑިވިއަން އިން ރާއްޖެއަށް ވައިޑް ބޮޑީ މަތިންދާބޯޓެއް އަންނަ ޖެނުއަރީ މަހު 6 ވަނަ ދުވަހު ގެނެސް ދަތުރުތައް ފަށަން ތައްޔާރުވަމުން އަންނަ ކަމަށް އެ ކުންފުނިން ބުނެފިއެވެ.
ރާއްޖެއަށް މީގެ ކުރިން މިފަދަ މަތިންދާބޯޓެއް ގެނެސްފައި ވަނީ މުޙައްމަދު އަމީންގެ ދައުރުގައި އެއާ މޯލްޑިވްސްއިންނެވެ. ނަމަވެސް އެ އެއާލައިން ވަނީ ބަނގުރޫޓުވެ 2000 ވަނަ އަހަރުގައި އޮޕަރޭޝަންތައް ހުއްޓާލާފައެވެ.
މޯލްޑިވިއަންގެ މި މަތިންދާބޯޓު ރާއްޖެ ގެނައުމަށް ކުރަންޖެހޭ ހުރިހާ މަސައްކަތެއް ކުރުމަށްޓަކައި މޯލްޑިވިއަންގެ ޓެކްނިކަލް ޓީމެއް މިވަގުތު ލިތުއޭނިއާގައި ހަރަކާތްތެރިވަމުން އެބަދެއެވެ.
Advertisement
ރައީސް ޑރ. މުޙައްމަދު މުޢިއްޒުގެ ވަޢުދުފުޅާއި އެއްގޮތަށް ވައިޑް ބޮޑީ އެއާކްރާފްޓުގެ ޚިދުމަތް ރާއްޖޭގައި ފެށުމަށްޓަކައި ކުރަމުންދާ މަސައްކަތުގެ ތެރެއިން ފުރަތަމަ މަތިންދާބޯޓު އަންނަ މަހު ގެންނަން ހަމަޖެހިފައިވާއިރު މި ބޯޓަކީ A-330 މަރުކައިގެ މަތިންދާބޯޓެކެވެ. މިއީ 264 މީހުން އުފުލޭ ބޯޓަކަށް ވާއިރު އަހަރެއްގެ ތެރޭގައި 60,000 ފަސިންޖަރުން މި ބޯޓުގައި އުފުލޭނެ ކަމަށް މޯލްޑިވިއަނުން އަންދާޒާކުރެއެވެ.
މޯލްޑިވިއަން އިން ފާހަގަކުރި ގޮތުގައި، މި ބޯޓަކީ ދަތުރުތަކުގައި ބޭނުންކުރުމަށް އެންމެ ރަނގަޅު މަތިންދާބޯޓެއްކަން އެ ޓީމަށް ކަށަވަރުވުމުން، އެ ބޯޓު ޚިދުމަތަށް ނެރުމަށް ކުރަންޖެހޭ މަސައްކަތްތައް މިދިޔަ އޮކްޓޯބަރު މަހުގެ ތެރޭގައި ވަނީ ފަށާފައެވެ.
މޯލްޑިވިއަން އިން ބުނީ ވައިޑްބޮޑީ މަތިންދާބޯޓު އަންނަ އަހަރުގެ ޖެނުއަރީ މަހުގެ 6 ވަނަ ދުވަހު މާލެ ގެނައުމަށް މަސައްކަތް ކުރަމުންދާކަމަށާއި، އެކަން ފާހަގަކުރުމަށް ޚާއްސަ ޙަރަކާތްތަކެއް އިންތިޒާމުކުރާނެކަމަށެވެ.
މީގެ އިތުރުން، ވައިޑްބޮޑީ މަތިންދާބޯޓުގެ ޚިދުމަތް އަންނަ އަހަރުގެ ކުރީކޮޅު ފެށުމަށްފަހު، އިތުރު މަތިންދާބޯޓެއް ގެނައުމުގެ މަސައްކަތް ވެސް ކުރަމުންދާކަމަށް މޯލްޑިވިއަން އިން މީގެކުރިން ވެސް ބުނެފައިވެއެވެ. މި މަސައްކަތަކީ ޤައުމީ އެއާލައިންގެ ތަރައްޤީއަށާއި، ދިވެހި މުވައްޒަފުންގެ ޤާބިލުކަން އިތުރުކުރުމަށް އެޅޭ މުހިންމު ފިޔަވަޅެއްކަމަށް ވެސް މޯލްޑިވިއަން އިން ބުންޏެވެ.
"މިއީ ހަމައެކަނި އައު މަތިންދާބޯޓެއް ގެނައުމުގެ މަސައްކަތެއް ނޫން. މިއީ އަޅުގަނޑުމެންގެ ދިވެހި މުވައްޒަފުންގެ ހުނަރާއި ޤާބިލުކަން ދައްކުވައިދޭ މުހިންމު މަސައްކަތެއް. މި މަސައްކަތުގެ ތެރެއިން އަޅުގަނޑުމެންގެ ޓެކްނިކަލް ޓީމުތަކަށް އައު ތަޖުރިބާތަކެއް ލިބި، އެމީހުންގެ ފަންނީ ޤާބިލުކަން އިތުރަށް ރަނގަޅުވެގެންދާނެ." މޯލްޑިވިއަން އިން ބުންޏެވެ.
ވައިޑްބޮޑީ މަތިންދާބޯޓު ރާއްޖެއަށް ގެނައުމުން، ދުރު މަންޒިލުތަކަށް ސީދާ ދަތުރުތައް ކުރުމުގެ ފުރުޞަތު ލިބި، ފަތުރުވެރިކަމުގެ ދާއިރާއަށް އިތުރު ކުރިއެރުންތަކެއް ލިބިގެންދާނެ ކަމަށާއި، މި ބޯޓުގެ ސަބަބުން ރާއްޖެއިން ބޭރަށް ކުރާ ދަތުރުތަކުގައި ދިވެހި ރައްޔިތުންނަށް އިތުރު ފަސޭހަތަކެއް ލިބިގެންދާނެކަމަށް މޯލްޑިވިއަން އިން ބުންޏެވެ.
މި މަސައްކަތަކީ ހަމައެކަނި މޯލްޑިވިއަންގެ ކުރިއެރުމަށް ކުރެވޭ މަސައްކަތެއް ނޫން ކަމަށާއި މިއީ މުޅި ރާއްޖޭގެ އިޤްތިޞާދަށާއި، ވައިގެ ދަތުރުފަތުރުގެ ދާއިރާއަށް ލިބޭ ވަރަށް ބޮޑު ކުރިއެރުމެއް ކަމަަށް މޯލްޑިވިއަން އިން ފާހަގަކުރިއެވެ.
