ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ގެ ކުރީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) އާއި އޭރުގެ ޗީފް ފައިނޭންޝަލް އޮފިސަރު ޔާސިރު ހަސަންގެ ގެއާއި ގުޅުންހުރި ދެތަނެއް ބަލައި ފާސްކޮށް، އިލެކްޓްރޯނިކް ސާމާނުތަކެއް ފުލުހުންގެ ބެލުމުގެ ދަށަށް ގެންގޮސްފިއެވެ.

ދިވެހި ފުލުހުންގެ ޚިދުމަތުން މިއަދު ނެރުނު ނޫސްބަޔާނެއްގައި ބުނެފައިވަނީ، މި ތަކެތި ގެންދިޔައީ ކުރީގެ ސަރުކާރުގެ ދުވަސްވަރު އާރުޑީސީގައި ހިންގާފައިވާ ކަމަށް ބެލެވޭ ޚިޔާނާތުގެ މައްސަލައެއްގެ ތަޙުޤީޤަށް ކަމަށެވެ. މި ތަޙުޤީޤުގެ ތެރެއިން ފުލުހުން ވަނީ ރޭގެ ވަގުތެއްގައި މޫސާ އަލިމަނިކާއި ޔާސިރު ދިރިއުޅޭ ތަންތަން ބަލައި ފާސްކޮށްފައެވެ.

ފުލުހުން ބުނީ، އާރުޑީސީއާ ގުޅޭގޮތުން ފުލުހުން ތަޙުޤީޤު ކުރަމުންދާ މައްސަލައެއްގައި ތަޙުޤީޤުގެ ބޭނުމަށް މޫސާ އަލިމަނިކު ދިރިއުޅޭ ތަނާއި ޔާސިރުއަށް ނިސްބަތްވާ ދެތަނެއް ބަލައި ފާސްކޮށްފައިވާ ކަމަށެވެ. އަދި އެތަންތަނުން އިލެކްޓްރޯނިކް ސާމާނުތަކެއް ސީޒްކުރެވިފައިވާ ކަމަށްވެސް ބުނެފައިވެއެވެ. ނަމަވެސް، ގެންދިޔަ ތަކެތީގެ ތަފްސީލެއް ފުލުހުން ހާމަކޮށްފައެއް ނުވެއެވެ.

މި މައްސަލައިގެ ތަޙުޤީޤު ފުލުހުން ފެށީ މިދިޔަ އަހަރުގެ ނޮވެމްބަރު މަހުއެވެ. މި މައްސަލައިގައި އާރުޑީސީގެ 14 މިލިއަން ރުފިޔާ ނިމިދިޔަ އެމްޑީޕީ ސަރުކާރުގެ ބައެއް ވެރިންނާއި އެމީހުންގެ މަސްލަޙަތު އޮންނަ ކުންފުނިތަކަށް ވަދެފައިވާކަމަށް ތުހުމަތުކުރެވެއެވެ.

ފުލުހުން ބުނީ މި މައްސަލައިގައި ތިން މީހެއްގެ ބައިވެރިވުން އޮތްކަން ޔަޤީންކުރެވިފައިވާކަމަށެވެ. އަދި އެ ތިން މީހުންގެ އަމިއްލަ އެކައުންޓުން ކުންފުނީގެ 14 މިލިއަން ރުފިޔާ ދައުރުކޮށްފައިވާކަމަށް ވެސް ފުލުހުން ބުންޏެވެ. މީގެ ތެރެއިން އެކަކުގެ އެކައުންޓަށް 11 މިލިއަން ރުފިޔާ އަދި އިތުރު ދެ މީހެއްގެ އެކައުންޓަށް 4 މިލިއަން ރުފިޔާ ޖަމާކޮށްފައިވާކަމަށް ފުލުހުން ހާމަކުރިއެވެ.

ފުލުހުން އިތުރަށް ބުނީ، މި މައްސަލައިގައި ހިމެނޭކަމަށް ތުހުމަތުކުރެވޭ މީހެއްގެ އެކައުންޓަށް އާރުޑީސީގެ އެކައުންޓުން 216 ޓްރާންސެކްޝަން ހަދާފައިވާކަމަށެވެ. އަދި ކޮންމެ ޓްރާންސެކްޝަނެއްގެ ތެރޭގައި އެތަކެއް މީހަކާއި ގުޅުންހުރި އިތުރު ޓްރާންސެކްޝަންތައް ހިމެނޭ ކަމަށާއި، އަދި އޭގެއިން ކޮންމެ އެކައުންޓެއްގެ މަޢުލޫމާތަކީ ވަކިވަކިން ހޯދަންޖެހޭ މަޢުލޫމާތު ކަމަށް ވެސް ފުލުހުން ބުންޏެވެ.

ފުލުހުން އިތުރަށް ހާމަކޮށްފައިވާ ގޮތުގައި، ޚިޔާނާތްތެރިވިކަމަށް ބެލެވޭ ފައިސާ ނިމިދިޔަ ސަރުކާރުގެ ބައެއް ވެރިންނާއި އެމީހުންގެ މަޞްލަޙަތު އޮންނަ ކުންފުނިތަކަށްވެސް ވަދެފައިވާކަން ތަޙުޤީޤަށް ހާމަވެފައިވެއެވެ.