ރާއްޖޭގެ ފަތުރުވެރިކަމުގެ ތާރީޚުގައި ފުރަތަމަ ފަހަރަށް އަހަރެއްގެ ތެރޭގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު ދެ މިލިއަނަށް އަރަން އޮތީ މަދު ގަޑިތަކެކެވެ. މިއީ ރާއްޖޭގެ ޓޫރިޒަމްގެ 52 އަހަރުގެ ދިގު ތާރީޚުގައި މީގެ ކުރިން ދެކެފައިނުވާ ކާމިޔާބީއެކެވެ.
ޓޫރިޒަމް މިނިސްޓްރީން މަޢުލޫމާތު ދެއްވިގޮތުގައި، ދެމިލިއަން ހަމަކުރުމަށް އިއްޔެއާއި ހަމަޔަށް މަދުވަނީ އެންމެ 841 ޓީރިސްޓުންނެވެ. އެހެންކަމުން މިއަދުގެ ވަގުތެއްގައި ދެ މިލިއަން ވަނަ ފަތުރުވެރިޔާ ރާއްޖެއަށް ޒިޔާރަތްކުރާނެއެވެ. އެވްރެޖްކޮށް މި ދުވަސްވަރު ދެހާހާއި ގާތްކުރާ ޢަދަދަކަށް ރާއްޖެއަށް ޓޫރިސްޓުން އާދެއެވެ. އެހެންކަމުން ދެން އޮތީ ހަމަ ކުޑަކުޑަ ހިނދުކޮޅެކެވެ. މި ތާރީޚީ ވަގުތު ފާހަގަކުރުމަށް ވެލާނާ އިންޓަރނޭޝަނަލް އެއަރޕޯޓުގައި ޚާއްޞަ ރަސްމިއްޔާތެއް ބޭއްވުމަށް ހަމަޖެހިފައި ވެއެވެ..
ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވީ މިއީ ވަރަށް ބޮޑު ކުރިއެރުމެއް ކަމަށާއި، މުޅި އިންޑަސްޓްރީގެ ބުރަ މަސައްކަތުން ހާސިލުކުރެވުނު ކާމިޔާބީއެއް ކަމަށެވެ. "މިއީ މުޅި ގައުމަށް، އަދި އިންޑަސްޓްރީއަށް ލިބޭ ފަޚުރެއް،" އޭނާ ވިދާޅުވިއެވެ.
2023 ވަނަ އަހަރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1.8 މިލިއަނަށް އެރުމާއި ގުޅިގެން، 2024 ގައި ދެ މިލިއަން ފަތުރުވެރިން ހަމަކުރުމަކީ މިނިސްޓަރު ފައިސަލްގެ އަމާޒަކަށް ވެފައިވެއެވެ. މި އަމާޒު ހާސިލުކުރުމަށް ގިނަގުނަ ގޮންޖެހުންތަކާ ކުރިމަތިލާންޖެހުނު ނަމަވެސް، އެކި ފަރާތްތަކުގެ މަސައްކަތުން މި ލަނޑުދަނޑި ވަނީ ހާސިލުކުރެވިފައެވެ.
މި އަހަރު ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާ، ރަޝިޔާ އަދި އިނގިރޭސިވިލާތުންނެވެ. ޗައިނާއިން 261,821 ފަތުރުވެރިން ޒިޔާރަތްކޮށްފައިވާއިރު، ރަޝިޔާއިން 217,724 އަދި އިނގިރޭސިވިލާތުން 176,312 ފަތުރުވެރިން ޒިޔާރަތްކޮށްފައިވެއެވެ.
ވެލާނާ އިންޓަނޭޝަނަލް އެއަރޕޯޓުގެ އައު ޓާމިނަލް ހުޅުވުމާއެކު، އަންނަ އަހަރު ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވާނެ ކަމަށް އުންމީދުކުރެވެއެވެ. މި ތާރީޚީ ކާމިޔާބީއާއެކު، ރާއްޖޭގެ ފަތުރުވެރިކަމުގެ ސިނާޢަތު އިތުރަށް ކުރިއަރައި، ޤައުމުގެ އިޤްތިޞާދަށް އިތުރު ފައިދާތަކެއް ލިބޭނެއެވެ.
