ބައްޝާރުލް އަސަދުގެ ސަރުކާރާ ދެކޮޅަށް ހަތިޔާރު ނަގައި ހަނގުރާމަކުރި ޖަމާއަތްތަކުން އާ ސަރުކާރާ ހަތިޔާރުތައް ހަވާލުކޮށް، ޖަމާއަތްތައް އުވާލައި ޑިފެންސް މިނިސްޓްރީގެ ދަށަށް ގެންދިއުމުގެ ޕްލޭނަށް އެއްބަސްވެއްޖެއެވެ.
ބައެއް ނުރަސްމީ ޗެނަލްތަކުން ބުނާ ގޮތުގައި މިއީ މާކުރިން ވެސް ހުޅަނގުން ހަދާފައިވާ ޕްލޭނެކެވެ. ނަމަވެސް ޚަބަތުރައް ބުނާ ގޮތުގައި މި ކަމާއި ގުޅޭ ގޮތުން ބޭއްވުނު ބައްދަލުވުމުގައި، ސީރިއާގެ އިރުއުތުރުގެ ސަރަހައްދުތައް ކޮންޓްރޯލްކުރާ އެމެރިކާގެ ތާއީދު ލިބިފައިވާ ކުރުދީ ހަނގުރާމަވެރިންގެ މަންދޫބުން ބައިވެރިވެފައެއް ނުވެއެވެ.
ސަނާ ނިއުސް އެޖެންސީއާއި އެހެނިހެން ކަމާބެހޭ އިދާރާތަކުން ނެރުނު ބަޔާނެއްގައި ބުނެފައިވާ ގޮތުން، މި ބައްދަލުވުން ނިމުނީ "ހުރިހާ ޖަމާއަތްތަކެއް އުވާލައި ޑިފެންސް މިނިސްޓްރީގެ ބެލުމުގެ ދަށުން އެ ޖަމާއަތްތައް ބެލެހެއްޓުމަށް" އެއްބަސްވެގެންނެވެ.
Advertisement
ސީރިއާގެ އާ ލީޑަރު އަހުމަދު އަލް ޝަރާ ވިދާޅުވެފައިވަނީ އާ އިދާރާތަކުން "ދައުލަތުގެ ކޮންޓްރޯލްގެ ބޭރުން އެ ގައުމުގައި ހަތިޔާރު ހުރުމުގެ ފުރުސަތު ނުދޭނެ" ކަމަށެވެ. މި އުސޫލު ކުރުދީ ހަނގުރާމަވެރިންނަށް ވެސް ހިނގާނެ ކަމަށް ޝަރާ ވިދާޅުވިއެވެ.
މި އެއްބަސްވުމަކީ އެމެރިކާއިން ފަންޑުކުރާ ޝަރާގެ ހަޔާތު ތަހްރީރު އަލް ޝާމް (އެޗްޓީއެސް) ޖަމާއަތުން އިސްނަގައިގެން ބައްޝާރުލް އަސަދުގެ ވެރިކަން ވައްޓާލުމުގެ ކާމިޔާބު އޮޕަރޭޝަނަށް ދެ ހަފްތާއެއްހާ ދުވަސް ފަހުން އައި ބޮޑު ކުރިއެރުމެކެވެ.
ސީރިއާގައި 13 އަހަރު ވަންދެން ހިނގި ދާޚިލީ ހަނގުރާމައިގެ ސަބަބުން ބައި މިލިއަނަށްވުރެ ގިނަ މީހުން މަރުވެ، އެކި ޖަމާއަތްތަކުން އެކި ސަރަހައްދުތަކުގައި ބާރު ގަދަކޮށްފައިވެއެވެ.
