ރާއްޖޭގެ ބައެއް ރަށްރަށުގެ މަގުމަތީގައި ވީއްލިގެން އުޅޭ ބުޅާތަކަށް އަނިޔާކޮށް މަރާކަމުގެ ޝަކުވާތަކެއް ލިބެމުންދާކަމަށާއި، އެކަން އެގޮތަށް ނުކުރުމަށް ދަނޑުވެރިކަމާއި ދިރޭތަކެއްޗާބެހޭ ވުޒާރާއިން އިލްތިމާސްކޮށްފިއެވެ.
ދަނޑުވެރިކަމާއި ދިރޭތަކެއްޗާބެހޭ ވުޒާރާއިން މިއަދު ނެރުނު ބަޔާނެއްގައި ބުނެފައިވަނީ މިހާރަކަށް އައިސް ރާއްޖޭގެ ބައެއް ރަށްރަށުގެ މަގުމަތީގައި ވީއްލިގެން އުޅޭ ބުޅާތަކަށް ގޯނާކޮށް، ހާނިއްކަކޮށް މަރާކަމުގެ ޝަކުވާތައް އެވުޒާރާއަށް ލިބެމުންދާ ކަމަށެވެ. އަދި މިއީ ޖަނަވާރުންގެ ދުޅަހެޔޮކަމުގެ މިންގަނޑުތަކާ ޚިލާފު ޢަމަލަކަށްވާތީ، އެކަން އެގޮތަށް ނުކުރުމަށް އިލްތިމާސްކުރާކަމަށް ވުޒާރާއިން ބުންޏެވެ.
ވުޒާރާއިން ބުނީ، ރާއްޖެއިން ބައިވެރިވެފައިވާ، ދުނިޔޭގެ ޖަނަވާރުންގެ ޞިއްޙަތާބެހޭ ޖަމިއްޔާގެ އެނިމަލް ހެލްތު ކޯޑުގައި ޖަނަވާރުންގެ ދުޅަހެޔޮކަމަށް ޚާއްޞަ އަހައްމިއްޔަތުކަމެއް ދީފައިވާ ކަމަށެވެ. މީގެ އިތުރުން، އިސްލާމް ދީނުގައިވެސް ދިރޭތަކެއްޗަށް ރަޙުމުކޮށް، އަޅާލައި، އޯގާތެރިވުމަށް ބާރުއަޅާކަމަށް ވުޒާރާއިން ފާހަގަކުރިއެވެ.
Advertisement
"ބުއްދިއެއްނުވާ އެއްޗަކަށްވާތީ ޖަނަވާރުންގެ ފަރާތުން އިންސާނުންނަށް އުނދަގޫތަކެއް ކުރިމަތިވުމަކީ އެކަށީގެންވާކަމެއް. ނަމަވެސް އެއީ އެ ތަކެއްޗަށް ގޯނާކުރަން ލިބޭ ސަބަބެއް ނޫން. އެފަދަ ކަމެއްކުރުމަކީ އިންސާނިއްޔަތާވެސް ޚިލާފު ޢަމަލެއް." ވުޒާރާއިން ބުންޏެވެ.
މި މައްސަލައަށް ޙައްލެއް ހޯދުމުގެ ގޮތުން، މާލޭގެ އިތުރުން ރަށްރަށުގެ މަގުމަތީގައި އުޅޭ ބުޅާތަކުގެ ޙާލަތު ދެނެގަތުމުގެ މަސައްކަތް ފަށަން ނިންމާފައިވާކަމަށް ވުޒާރާއިން ވަނީ ހާމަކޮށްފައެވެ. އަދި މާލޭގައި ގިނަވެފައިވާ ބުޅާތަކަށް ހިޔާވައްސެއް ފޯރުކޮށްދީ، އެ ތަކެތީގެ ދުޅަހެޔޮކަން ކަށަވަރުކުރުމަށް "އޮޅު ހިޔާ" ގެ ނަމުގައި ކެޓް ޝެލްޓަރއެއް ސަރުކާރުން ޤާއިމްކޮށްފައިވާ ކަމަށާއި، އެތަން އޮޕަރޭޝަނަށް ގެނައުމުގެ މަސައްކަތް މިހާރު ފަށާފައިވާ ކަމަށްވެސް ވުޒާރާއިން ފާހަގަކުރިއެވެ.
