ޔޫކްރެއިނާ ދެކޮޅަށް ކުރަމުންދާ ހަނގުރާމައިގައި ރަޝިޔާއަށް ވާގިވެރިވުމަށް އުތުރު ކޮރެޔާއިން އިތުރު ސިފައިންނާއި ހަތިޔާރު ފޮނުވަން ތައްޔާރުވަމުންދާކަމަށް ދެކުނު ކޮރެޔާގެ ޖޮއިންޓް ޗީފްސް އޮފް ސްޓާފްސް (ޖޭސީއެސް) އިން ބުނެފިއެވެ.

ޚަބަރުތައް ބުނާ ގޮތުގައި އުތުރު ކޮރެޔާއިން މިހާރުވެސް 240އެމްއެމްގެ ރޮކެޓު ލޯންޗަރުތަކާއި 170އެމްއެމްގެ އަމިއްލައަށް ޕްރޮޕެލްކުރާ ބަޑިތައް ރަޝިޔާއަށް ފޯރުކޮށްދީފައިވެއެވެ. އަދި މިދިޔަ މަހު ހަތިޔާރު ޓެސްޓު ކުރުމަށްފަހު، އިތުރު ސުއިސައިޑު ޑްރޯނުތައް ރަޝިޔާއަށް ފޮނުވުމަށް އުތުރު ކޮރެޔާއިން ތައްޔާރުވަމުންދާ ކަމަށް ފާހަގަކޮށްފައިވެއެވެ.

ޖޭސީއެސްއާއި ހަވާލާދީ ޚަބަރުތައް ބުނެފައިވާ ގޮތުގައި، ސުއިސައިޑު ޑްރޯނު ފޮނުވުމަކީ އުތުރު ކޮރެޔާގެ ރައީސް ކިމް ޖޮން އުން މި ވަގުތަށް އެންމެ މުހިންމުކަން ދެއްވާ މަސައްކަތެވެ. އަދި ރަޝިޔާއަށް މި ޑްރޯންތައް ފޮނުވުމުގެ ނިޔަތް އުތުރު ކޮރެޔާއިން ކުރިން ފާޅުކޮށްފައިވާ ކަމަށްވެސް ބުނެފައިވެއެވެ.

ދެކުނު ކޮރެޔާއާއި އެމެރިކާއާއި ޔޫކްރޭނުން ބުނާ ގޮތުގައި، އުތުރު ކޮރެޔާގެ 12,000 އަށްވުރެ ގިނަ ސިފައިން ރަޝިޔާއާ އެކު ޙަރަކާތްތެރިވެއެވެ. ޖޭސީއެސްއިން ބުނެފައިވާ ގޮތުގައި، އޭގެ ތެރެއިން 1,100 ސިފައިން ވަނީ ހަނގުރާމައިގައި މަރުވެފައި ނުވަތަ ޒަޚަމްވެފައެވެ.

ޖޭސީއެސްއިން އިތުރަށް ބުނެފައިވާ ގޮތުގައި، ކުރިއަށް އޮތް އަހަރުގެ ތެރޭގައި ރަޝިޔާގެ ވާގިވެރިކަމާއެކު އެކި ކަހަލަ އިސްތިރާޖީ ޖެއްސުންތައް އުތުރު ކޮރެޔާއިން ކުރާނެ ކަމަށް ބެލެވެއެވެ. މީގެ ތެރޭގައި ބައްރުތައް ހުރަސްކޮށް ދަތުރުކުރެވޭ ބެލިސްޓިކް މިސައިލު ފޮނުވުމާއި ނިއުކުލިއާ ތަހުލީލުތައް ކުރުން ހިމެނޭ ކަމަށް ޖޭސީއެސްއިން ބުނެފައިވެއެވެ.