ރަޝިޔާގެ ޕާސްޕޯޓާއި އެ ގައުމުގެ ރައްޔިތަކަށް ވުމަށް އެދި ހުށަހަޅާ ރަސްމީ ލިޔެކިޔުންތަކުގައި ބޭނުންކުރާ ފޮޓޯތަކުގައި، ބުރުގާ އަދި އެހެނިހެން ދީނީ ފޭރާންތަކުން ބޯ ނިވާކުރުމުގެ ހުއްދަ އޮންނަކަން އެ ގައުމުގެ ކަމާބެހޭ އިދާރާތަކުން އަލުން ކަށަވަރުކޮށްދީފިއެވެ.
މި އުސޫލު ހަމަޖެހިފައިވާ ގޮތުން، ދީނީ ސަބަބުތަކަށްޓަކައި ބުރުގާ އަޅައިގެން ނަގާ ފޮޓޯ ބަލައިގަންނާނީ، އެ މީހެއްގެ މޫނުމަތީގެ ސިފަތައް ރަނގަޅަށް ފެންނަން ހުންނަ ނަމައެވެ. އަދި ބައޯމެޓްރިކް މިންގަނޑުތަކަށް ފެތޭ ގޮތަށް، ނިތްކުރިއާއި ދަތްދޮޅި އަދި މޫނުގެ ބައްޓަން ސާފުކޮށް ފެންނަން ޖެހޭނެއެވެ. މޫނުގެ އެއްވެސް ބައެއް ނިވާވާ ގޮތަށް ނަގާފައިވާ ފޮޓޯތައް ބަލައިނުގަނެވޭނެ ކަމަށްވެސް އުސޫލުގައި ބަޔާންކޮށްފައިވެއެވެ.
ރަޝިޔާގެ މި ނިންމުމަކީ ސަލާމަތީ އަދި ބައޯމެޓްރިކް މިންގަނޑުތައް ހިފަހައްޓަމުން، ދީނީ އަޅުކަންތަކާއި އާދަކާދަތަކަށް އިހުތިރާމްކޮށް ލުއިފަސޭހަކޮށްދިނުމުގެ ގޮތުން އެޅި މުހިންމު ފިޔަވަޅެކެވެ. މިއީ މުޅިން އަލަށް ތައާރަފުކުރި އުސޫލެއް ނޫން ނަމަވެސް، މިއީ މިހާރު އަމަލުކުރެވެމުންދާ ގަވާއިދުތައް އިތުރަށް ސާފުކޮށްދިނުމުގެ ގޮތުން އާންމުކުރި އިއުލާނެކެވެ. ރަޝިޔާގައި 2003 ވަނަ އަހަރުން ފެށިގެން ޕާސްޕޯޓް ފޮޓޯތަކުގައި ދީނީ ގޮތުން ބޯ ނިވާކުރުމުގެ ހުއްދަ ދީފައިވާއިރު، ރަޝިޔާގެ އިންޓީރިއާ މިނިސްޓްރީން ވަނީ 2024 ވަނަ އަހަރުގެ މެއި މަހު، ރައްޔިތުކަމަށް އެދި ހުށަހަޅާ ފޮޓޯތަކުގައިވެސް ބުރުގާ އެޅުމުގެ ހުއްދަ ރަސްމީކޮށް ހަމަޖައްސާފައެވެ.
Advertisement
މި އުސޫލުގެ ސަބަބުން ރަޝިޔާގައި ދިރިއުޅޭ މުސްލިމް އަންހެނުންނަށް، އެކަނބަލުންގެ ދީނީ ވާޖިބުތަކާއި ހިޖާބު ދަމަހައްޓަމުން ރަސްމީ ލިޔެކިޔުންތަކުގެ ހިދުމަތް ހޯދުމަށް ވަރަށް ބޮޑު ލުއިފަސޭހަކަމެއް ލިބިގެންދާނެއެވެ.
