ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދިރިއުޅޭ ގެ ބަލައި ފާސްކޮށް، ބައެއް އެެއްޗެހި ފުލުހުންގެ ބެލުމުގެ ދަށަށް ރޭ ގެންގޮސްފިއެވެ.

ފުލުހުން މިއަދު ބުނީ ބިންވެރިޔާ އަދި ގެދޮރުވެރިޔާ ސްކީމާ ގުޅިގެން ކުރަމުން އަންނަ ތަޙުޤީޤަށް އެޗްޑީސީގެ ކުރީގެ އެމްޑީ ފަޒުލް ދިރިއުޅޭ ގެ، ބަލައި ފާސްކޮށްފައިވާ ކަމަށެވެ. އެ ގެ ބަލައި ފާސްކުރީ ކޯޓު އަމުރެއްގެ ދަށުން ކަމަށް ވެސް ފުލުހުން ބުންޏެވެ.

އެ ގެ ބަލައި ފާސްކޮށް، ތަހުގީގުގެ ބޭނުމަށް ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށާއި އޭގެ ތެރޭގައި ބައެއް އިލެކްޓްރޯނިކް ސާމާނު ހިމެނޭ ކަމަށް ވެސް ފުލުހުން ބުންޏެވެ.

ބިންވެރިޔާ ސްކީމަށް ޝަރުތު ހަމަނުވާ ބަޔަކަށް ހުޅުމާލެއިން ބިންތަކެއް އެޗްޑީސީން ދިން ކަމަށް ބުނާ މައްސަލަ އާއި ވިނަރެސް ފްލެޓް ދިނުމުގައި ކޮރަޕްޝަނުގެ ޢަމަލުތަކެއް ހިންގި ކަމަށް ބުނާ މައްސަލައާއި ގެދޮރުވެރިޔާގެ ސްކީމްގެ ދަށުން ފްލެޓު ދިނުމުގައި ބޮޑެތި އޮޅުވާލުންތަކެއް ހުރި ކަމަށް ތުހުމަތުކުރެވޭ މައްސަލަ ފުލުހުންނާއި އޭސީސީން ވެސް އަންނަނީ ތަޙުޤީޤުކުރަމުންނެވެ.

ފުލުހުންނާއި އޭސީސީން މި މައްސަލަތައް ތަޙުޤީޤުކުރާތީ ތަޙުޤީޤަށް ފުރުޞަތު ދިނުމުގެ ގޮތުން ކަމަށް ވިދާޅުވެ، މިދިޔަ ހޮނިހިރު ދުވަހު ފަޒުލް ވަނީ މަޤާމުން އިސްތިއުފާ ދެއްވާފައެވެ.

ފަޒުލް އިސްތިއުފާ ދެއްވުމުން އެޗްޑީސީގެ މެނޭޖިން ޑިރެކްޓަރުގެ މަޤާމަށް މިހާރު ވަނީ ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލް އައްޔަންކޮށްފައެވެ.