ސްލޮވޭކިއާގެ ބޮޑުވަޒީރު ރޮބަރޓް ފީކޯ އިއްޔެ މޮސްކޯއަށް ކުއްލި ދަތުރުފުޅެއް ކުރައްވައި، ރަޝިއާގެ ރައީސް ވްލަޑިމިއަރ ޕުޓިންއާ ބައްދަލުކުރައްވައިފިއެވެ. މި ދަތުރުފުޅަކީ ރަޝިއާއިން ޔޫކްރޭނަށް ހަމަލާދޭން ފެށި ފަހުން، ހުޅަނގުގެ ލީޑަރަކު ޕުޓިންއާ ބައްދަލުކުރެއްވި ތިންވަނަ ފަހަރެވެ.

ބޮޑުވަޒީރު ފީކޯ ވިދާޅުވި ގޮތުގައި މި ދަތުރުފުޅުގެ މައިގަނޑު މަޤްޞަދަކީ ރަޝިއާގެ ގޭސް ސްލޮވޭކިއާއަށް ސަޕްލައިކުރުމާއި ގުޅޭގޮތުން މަޝްވަރާކުރެއްވުމެވެ. އަދި މީގެ އިތުރުން ޔޫކްރޭނުގެ ހަނގުރާމައާއި ގުޅޭގޮތުން ޚިޔާލު ބަދަލުކުރައްވައި، ހަނގުރާމަ ހުއްޓުވުމާއި ސުލްޙަ ގެނައުމާއި ގުޅޭ މަޝްވަރާތައް ވެސް ކުރެއްވިއެވެ.

މި ދަތުރުފުޅާ ގުޅިގެން ނޭޓޯ އާއި ޔޫރަޕިއަން ޔޫނިއަންގެ ސަމާލުކަން ވަނީ އިތުރުވެފައެވެ. ބޮޑުވަޒީރު ފީކޯ ވިދާޅުވި ގޮތުގައި ދަތުރުފުޅުގެ މަޢުލޫމާތު ޔޫރަޕިއަން ޔޫނިއަންގެ ކަމާބެހޭ ފަރާތްތަކަށް ވަނީ އަންގަވާފައެވެ. ނަމަވެސް، ނޭޓޯގެ މެންބަރު ޤައުމެއްގެ ލީޑަރަކު ރަޝިއާއާ ބައްދަލުކުރެއްވުމުން އިއްތިހާދުގެ ކަންބޮޑުވުން ވަނީ އިތުރުވެފައެވެ.

ފީކޯ ބޮޑުވަޒީރުކަމަށް އަލުން އައްޔަނުކުރެވުމާއެކު ސްލޮވޭކިއާގެ ސިޔާސަތަށް ބޮޑު ބަދަލެއް އައިސްފައިވެއެވެ. އެގޮތުން، ޔޫކްރޭނަށް ދެމުންދިޔަ އަސްކަރީ އެހީތެރިކަން ވަނީ ހުއްޓުވާލާފައެވެ. ނަމަވެސް، ޔޫކްރޭނާއެކު އޮންނަ އެކުވެރިކަން ދަމަހައްޓާނެކަމަށް ބޮޑުވަޒީރު ފީކޯ ވަނީ ވިދާޅުވެފައެވެ.

ސްލޮވޭކިއާ އަދި ހަންގޭރީ ފަދަ ޤައުމުތަކަކީ ރަޝިއާގެ ގޭހަށް ބަރޯސާވާ ޤައުމުތަކެކެވެ. މިކަމާ ގުޅިގެން، ރަޝިއާއާ ދެކޮޅަށް އަޅާފައިވާ ފިޔަވަޅުތަކުގެ ހަރުދަނާކަމާމެދު ސުވާލު އުފެދިފައިވެއެވެ.

ފާހަގަކޮށްލަން ޖެހޭ ކަމަކީ، ޕޫޓިން މި ފިނި މޫސުމުން އައުމުގެ ކުރިން ހުޅަނގަށް އިންޒާރު ދެއްވާފައިވަނީ، ރަޝިއާ އާއި ދެކޮޅަށް ނުކުމެ އުޅޭނަމަ ފިނިމޫސުމުގައި ޖެހޭނީ ފިނީގައި ގަނޑުވާށެވެ. މާނައަކީ ރަޝިއާއިން ގޭހެއް ދޫނުކުރާމެ ކަމަށެވެ.