ރަޝިޔާގެ ވައިގެ ދިފާޢީ ނިޒާމުން އެއް ރެއެއްގެ ތެރޭގައި ރަޝިޔާގެ ތަފާތު ފަސް ސަރަހައްދަކަށް ހަމަލާދިން ޔޫކްރޭންގެ 42 ޑްރޯން ވައްޓާލައި ނައްތާލައިފިއެވެ.

އިނގިރޭސިވިލާތުގެ ރޮއިޓާސް ނޫސް އެޖެންސީން ބުނާ ގޮތުގައި ރަޝިޔާގެ ޑިފެންސް މިނިސްޓްރީން އިއްޔެ ރިޕޯޓްކޮށްފައިވާ ގޮތުގައި އޮރިއޯލް ސަރަހައްދުގައި 20 ޑްރޯން ނައްތާލާފައިވާއިރު، ރޮސްޓޯވް އަދި ބްރައިއަންސްކް ސަރަހައްދުގައި އަށް ޑްރޯން ވަނީ ނައްތާލާފަ އެވެ.

އެ މިނިސްޓްރީން ޓެލެގްރާމް އެޕްގައި ކުރި ޕޯސްޓެއްގައި އިތުރަށް ބުނެފައި ވަނީ ކަރސްކް ސަރަހައްދުގެ މަތިން ފަސް ޑްރޯން އާއި ކްރަސްނޯޑާ ކްރައިގެ މަތިން އެއް ޑްރޯން ރަޝިޔާގެ ޑިފެންސްތަކުން ނައްތާލާފައިވާ ކަމަށެވެ.

ރަޝިޔާގެ ހުޅަނގުގެ އޮރިއޯލް ސިޓީގެ ގަވަރުނަރު އެންޑްރީ ކްލިޗްކޯވް ވިދާޅުވީ ޑްރޯން ވެއްޓުމުން ސްޓަލްނޮއިކޯން އަވަށުގެ ފިއުލް ޑިޕޯއެއްގައި އަލިފާން ރޯވެފައިވާ ކަމަށެވެ.

ތެޔޮ ރައްކާކުރާ ތަނުގައި ހިނގި އަލިފާންގަނޑު ނަސީބަކުން އަވަހަށް ކޮންޓްރޯލް ކުރެވި އަލިފާންގަނޑު މުޅިން ނިއްވާލާފައިވާއިރު، އެސަރަހައްދަށް އެއްވެސް މީހަކަށް ގެއްލުމެއް ނުލިބޭ ކަމަށް އޭނާ ވިދާޅުވި.

^{ތެޔޮ ރައްކާކުރާ ތަނުގައި ހިނގި އަލިފާންގަނޑު ވަރަށް އަވަހަށް ކޮންޓްރޯލް ކުރެވުނު ކަމަށް ރަޝިއާއިން ބުނޭ. / ފޮޓޯ: އޭއެފްޕީ}

އޮރިއޯލްގެ ގަވަރުނަރު އެންޑްރީ ކްލިޗްކޯވް އިތުރަށް ވިދާޅުވީ 'މިއީ އޮރިއޯލްގައި ތެޔޮ ރައްކާކުރާ ތަންތަނަށް ހަމަލާދިން ދެވަނަ ހަފްތާ' ކަމަށެވެ.

ރޮސްޓޮވް އަދި ބްރައިއަންސްކް ސަރަހައްދުގެ ވެރިން ވެސް ވަނީ އެންމެ ފަހުން ޑްރޯން ހަމަލާތަކުގައި އެއްވެސް މީހަކަށް ގެއްލުމެއް ލިބިފައި ނުވާ ކަމަށް އާންމުކޮށްފައިވާ ރިޕޯޓްތަކުގައި ސާފުކޮށްދީފަ އެވެ.