މޯލްޑިވްސް ފުޓްބޯލް އެސޯސިއޭޝަން (އެފްއޭއެމް)ގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް އިތުރު ދަޢުވާތަކެއް މިއަދު އުފުލައިފިއެވެ. މި ދަޢުވާތައް އުފުލާފައިވަނީ ފުޓްބޯޅައިގެ މައި އިދާރާ ފީފާއިން އެފްއޭއެމްއަށް ފޮނުވި ފައިސާއަށް ހިޔާނާތްތެރިވި ކުށުގައެވެ.
ޕްރޮސެކިއުޓަރ ޖެނެރަލްގެ އޮފީހުން މަޢުލޫމާތު ދެއްވިގޮތުގައި، އޭނާ އަމީން އެވެނިއުއިން އެޕާޓްމަންޓެއް ގަތުމަށް ފައިސާ ޖަމާކުރުމަށްޓަކައި އެފްއޭއެމްގެ 1.2 މިލިއަން ޑޮލަރަށް ހިޔާނާތްތެރިވެފައިވާތީ، ހިޔާނާތްތެރިވުމުގެ ދަޢުވާ އުފުލާފައިވެއެވެ. މި ދަޢުވާ ސާބިތުވެއްޖެނަމަ، އެއް އަހަރާއި ހަތް މަހާއި ހަ ދުވަހުގެ މުއްދަތަކަށް ޖަލަށްލުމުގެ އަދަބު ކަނޑައެޅިދާނެއެވެ.
ދެވަނަ ދަޢުވާއަކީ މަނީ ލޯންޑްރިންގގެ ދަޢުވާއެވެ. މި ދަޢުވާގައި ބުނެފައިވަނީ ބައްސާމް އަމީން އެވެނިއުގެ ބްލޮކް A ގެ 12 އަދި 13 ވަނަ ފަންގިފިލާގެ އަށް ކޮޓަރި އާއި 10 ފާޚާނައިގެ އެޕާޓްމަންޓް ގަތުމަށް އެއްބަސްވުމެއްގައި ސޮއިކޮށް، އެފްއޭއެމްގެ ޑޮލަރު އެކައުންޓުން އެކި އެކި ކުންފުނިތަކަށް ފައިސާ ފޮނުވައި، އެ ފައިސާ އަމީން ކޮންސްޓްރަކްޝަނަށް ދައްކާފައިވާ ކަމަށެވެ. މި ދަޢުވާ ސާބިތުވެއްޖެނަމަ، 100,000 ރުފިޔާއާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާކޮށް، 5-15 އަހަރާ ދެމެދުގެ މުއްދަތަކަށް ޖަލަށްލެވިދާނެއެވެ.
މީގެ އިތުރުން، އެފްއޭއެމަށް ލިބުނު ގެއްލުމުގެ ބަދަލުގެ ގޮތުގައި ބައްސާމް އަތުން 1.2 މިލިއަން ޑޮލަރު ނެގުމާއި އެ ޕެންޓްހައުސް ދައުލަތަށް ނެގުމަށްވެސް ޕްރޮސެކިއުޓަރ ޖެނެރަލްގެ އޮފީހުން އެދިފައިވެއެވެ.
ޕްރޮސެކިއުޓަރ ޖެނެރަލްގެ އޮފީހުން އިތުރަށް ބުނީ، ހިޔާނާތުގައި ބައިވެރިވި އެފްއޭއެމްގެ އެހެން މުވައްޒަފުންގެ މައްޗަށް ވެސް ދަޢުވާކުރުމަށް ތައްޔާރުވަމުން އަންނަ ކަމަށެވެ. އަދި ފުލުހުން ތަޙުޤީޤުކުރާ މައްސަލައަކަށްވާތީ، ތަޙުޤީޤަށް ކުރިއެރުން ލިބޭ ވަރަކުން ކޯޓަށް އިތުރު ދަޢުވާތައް ހުށަހަޅާނެ ކަމަށް ވެސް ޕްރޮސެކިއުޓަރ ޖެނެރަލްގެ އޮފީހުން ބުންޏެވެ.
