ބީއެމްއެލް 48 ވަނަ ގައުމީ ފެތުމުގެ މުބާރާތުގެ އޯޕަން ބައިން އެއްވަނަ ވަނީ މުޙައްމަދު ރިހާން ޝިހާމް އާއި ހަމްނާ އަޙްމަދު ހޯދާފައެވެ. ރާއްޖެއިން ބޭރުގައި ސްކޮލަޝިޕެއް ފުރިހަމަ ކުރަމުން އަންނަ ހަމްނާ، މި ފަހަރުގެ ގައުމީ މުބާރާތުގައި ވާދަކޮށް އަންހެން ބައިން އެއްވަނަ ހޯދީ 100 ޕޮއިންޓާ އެކުގައެވެ.

އަންހެން ބައިގެ ދެވަނަ އަށް ދިޔަ ޒައިނަބް ޢަބްދުﷲ ޝަފީޤް އަށް 90 ޕޮއިންޓް ލިބުނުއިރު، ތިންވަނަ ހޯދި މެރާލް ޢައިން ލަޠީފް އަށް ވަނީ 80 ޕޮއިންޓް ލިބިފައެވެ. އެއްވަނަ ފިރިހެން އެތުލީޓަކަށް ހޮވުނު ރިހާން ވަނީ 105 ޕޮއިންޓް ހޯދާފައެވެ.

ފިރިހެން ބައިގެ ދެވަނަ އަށް ދިޔަ ޢަލީ އިމްރާން އަށް 95 ޕޮއިންޓް ލިބުނުއިރު، ތިންވަނަ ހޯދި ދާއިން އަޙްމަދު ޝަގީފް ވަނީ 85 ޕޮއިންޓް ހޯދާފައެވެ.

ޖޫނިއަރ ފިރިހެން ކެޓަގަރީގެ އެއްވަނަ ހޯދީ 90 ޕޮއިންޓް ލިބުނު ޒުކައިން ޢަބްދުﷲ ޙަނީފެވެ. ދެވަނަ ހޯދި އައިމަން މޫސާ ރަޝީދު އަށް 75 ޕޮއިންޓް ލިބުނުއިރު، ތިންވަނަ ހޯދި މުޙައްމަދު އަލްޔާން ޝިފާން އާއި ޒާކިން އަޝްރަފް ރަޝީދަށް ވަނީ 35 ޕޮއިންޓް ލިބިފައެވެ.

ޖޫނިއަރ އަންހެން ބައިން އެއްވަނަ ހޯދީ 95 ޕޮއިންޓާ އެކު އަމްނާ ތަޒްކިޔާ މިރްސާދެވެ. ދެވަނަ އަށް ދިޔައީ ލައިލީ އަޙްމަދު ނަވާޒް، ޒޯހާ އަޒްލީ ނަޒީމް އަދި ސާރާ މުޙައްމަދެވެ. މި ތިން ފެތުންތެރިންނަށް 50 ޕޮއިންޓް ލިބުނެވެ.

އީއޭޑީ ފިރިހެން ކެޓަގަރީން އެއްވަނަ ލިބުނީ 60 ޕޮއިންޓް ހޯދި މޫސާ ޖާއިޝް ސަނާއުﷲ ޝަކީބަށެވެ. މާސްޓާސް ކެޓަގަރީން އެއްވަނަ ހޯދީ 70 ޕޮއިންޓް ހޯދި އަޙްމަދު ޝާވީ ރާފިޢެވެ.

ޓީމުތަކުގެ ތެރެއިން އެއްވަނަ ފިރިހެން ޓީމަކީ 330 ޕޮއިންޓް ހޯދި ފީނަ ސްވިމިން އެކެޑަމީއެވެ. އެއްވަނަ އަންހެން ޓީމަކީ 305 ޕޮއިންޓް ހޯދި ޑީއެޗްއައި ސްޕޯޓްސް ކްލަބެވެ.