އިންޑިއާގައި ބޮޑު މަގުބޫލުކަމެއް ހޯދާފައިވާ ފިލްމު "ޕުޝްޕާ 2" މިއަންނަ އަހަރު ނެޓްފްލިކްސްގައި ސްޓްރީމްކުރާނެ ކަމަށް ރިޕޯޓުތަކުން ހާމަކޮށްފިއެވެ. މި ފިލްމު ނެރުނީއްސުރެ އެތައް ބަޔަކު ދަނީ އޮންލައިންކޮށް ސްޓްރީމްކުރަން ފަށާނެ ދުވަހަކަށް އިންތިޒާރު ކުރަމުންނެވެ.
އިންޑިއާގެ އީޓައިމްސް ރިޕޯޓުގައި ބުނެފައިވާ ގޮތުގައި، މި ފިލްމު އޮންލައިންކޮށް ސްޓްރީމްކުރާނީ ދުނިޔޭގެ އެތައް ބަޔަކު ބޭނުންކުރާ ޕްލެޓްފޯމް، ނެޓްފްލިކްސް އިންނެވެ. ރިޕޯޓުތަކުން ހާމަކޮށްފައިވާ ގޮތުގައި ނެޓްފްލިކްސްއިން މި ފިލްމުގެ ސްޓްރީމިންގ ރައިޓްސް ގަނެފައިވަނީ 275 ކްރޯޑު އިންޑިއަން ރުޕީސްއަށެވެ.
އާންމު ގޮތެއްގައި މިފަދަ ފިލްމުތައް އޮންލައިންކޮށް ސްޓްރީމްކުރަން ފަށަނީ ތިއޭޓަރުތަކުގައި ނެރޭތާ 6-8 ހަފްތާ ފަހުންނެވެ. އެހެންކަމުން ރިޕޯޓުތަކުގައި ބުނެފައިވަނީ "ޕުޝްޕާ 2" ނެޓްފްލިކްސްގައި ސްޓްރީމްކުރަން ފަށާނެ ކަމަށް ލަފާކުރެވެނީ 2025 ވަނަ އަހަރުގެ ފެބްރުއަރީ މަހުގައި ކަމަށެވެ. ނަމަވެސް، ނެޓްފްލިކްސްއިން އަދި މި ފިލްމު ސްޓްރީމްކުރަން ފަށާނެ ރަސްމީ ތާރީޚެއް ހާމަކޮށްފައެއް ނުވެއެވެ.
Advertisement
ދުނިޔޭގެ އެކި ކަންކޮޅުތަކުގައި ތަފާތު އެކި ބަހުރުވައިން ނެރުނު މި ފިލްމަށް ވަނީ ވަރަށް ގިނަ ބައެއްގެ ތަރުހީބު ލިބިފައެވެ. ބޮކްސް އޮފީހުގެ ހިސާބުތަކަށް ބަލާއިރު، މި ފިލްމު ނެރުނުތާ 13 ދުވަސް ތެރޭގައި އިންޑިއާއިން އެކަނި 953.3 ކްރޯޑު ރުޕީސްގެ އާމްދަނީއެއް ލިބިފައިވާ ކަމަށް މީޑިއާތަކުން ވަނީ ރިޕޯޓުކޮށްފައެވެ.
މި ފިލްމު ނެޓްފްލިކްސްގައި ސްޓްރީމްކުރަން ފެށުމުން، ދުނިޔޭގެ އެކި ކަންކޮޅުތަކުގައި ތިބި ގިނަ ފަރާތްތަކަކަށް މި ފިލްމު ފަސޭހައިން ބެލުމުގެ ފުރުސަތު ލިބިގެންދާނެއެވެ.
