ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ކޮރަޕްޝަނާއި، ހައުސިންގ ޑިވެލޮޕްމަންޓް ކޯޕަރޭޝަނުގައި މިދިޔަ ބުރާސްފަތި ދުވަހު ހިނގި އަލިފާނުގެ ޙާދިސާއާ އެއްވެސް ގުޅުމެއް ވާކަން ފާހަގަކުރެވިފައި ނުވާކަމަށް ފުލުހުން ބުނެފިއެވެ.

ފުލުހުން މިރޭ ބޭއްވި ނޫސްވެރިންގެ ބައްދަލުވުމެއްގައި ބުނީ ހައުސިންގ މިނިސްޓްރީގައި ހިނގި އަލިފާނުގެ ޙާދިސާއަކީ ބަޔަކު ގަސްތުގައި ހިންގި ޙާދިސާއެއް ކަމަށް ސޯޝަލް މީޑިއާގައި ތުހުމަތުކުރަމުން އަންނަ ކަމަށެވެ. އެގޮތުން ހައުސިންގ މިނިސްޓްރީގައި ގަސްތުގައި ރޯކޮށްލާފައިވާ ކަމަށް ތުހުމަތުކޮށް، އެކަން އެގޮތަށް ކޮށްފައިވަނީ އެޗްޑީސީގެ ކޮރަޕްޝަނުގެ މައްސަލައާ ގުޅިގެން ހެކިތަކެއް ނައްތާލުމަށްޓަކައި ކަމަށް ތުހުމަތުތައް ކުރަމުން އަންނަ ކަމަށް ފުލުހުން ބުންޏެވެ.

ފުލުހުން ބުނީ އެޗްޑީސީގެ ކޮރަޕްޝަނާ ގުޅޭ ތަޙުޤީޤަށް މިހާތަނަށް 24 ގަޑިއިރު ވެފައިވާއިރު، އެ މައްސަލައާއި ހައުސިންގ މިނިސްޓްރީގައި ހިނގި އަލިފާނުގެ ޙާދިސާއާ އެއްވެސް ގުޅުމެއްވާކަން ތަޙުޤީޤަށް ފާހަގަކުރެވިފައި ނުވާ ކަމަށެވެ. އަދި މި ދެ މައްސަލަވެސް ތަޙުޤީޤުކުރަމުން އަންނަނީ ވަރަށް ސީރިއަސް ދެ މައްސަލައިގެ ގޮތުގައި ކަމަށް ފުލުހުން ބުންޏެވެ.

ފުލުހުން ބުނީ އެޗްޑީސީގެ ކޮރަޕްޝަނުގެ މައްސަލަ ފެންމަތިވުމާ ގުޅިގެން އެންމެ ފުރަތަމަ ވެސް ކުރި މަސައްކަތަކީ ކަމާ ގުޅޭ މުއައްސަސާތަކާ ބައްދަލުކޮށް، ލިޔެކިޔުންތަކުގެ ޞައްޙަކަން ކަށަވަރުކުރުން ފެށުން ކަމަށެވެ. އެގޮތުން އެޗްޑީސީއަށް ވެސް ގޮސް ބެލި ބެލުމުން، ސޯޝަލް މީޑިއާގައި ދައުރުވަމުން ދިޔަ ލިޔުމަކީ އެޗްޑީސީގެ ތެރޭގައި ވެސް އޮތް ލިޔުމެއް ކަން ކަށަވަރު ވެގެން ދިޔަކަމަށް ފުލުހުން ބުންޏެވެ.

ފުލުހުން ބުނީ އެޗްޑީސީގެ ކޮރަޕްޝަނާ ގުޅޭ ގޮތުން އެ ކޯޕަރޭޝަނުން ބޭނުންވާ ލިޔެކިޔުންތައް އިއްޔެވެސް ހޯދާފައިވާ ކަމަށާއި، ބަލަމުން އަންނަނީ ފޯޖަރީއާ ގުޅޭ މައްސަލައެއް ކަމަށެވެ. އަދި މި މައްސަލައާ ގުޅޭ އެހެން ލިޔެކިޔުންތައް ވެސް އެޗްޑީސީއާއި އެހެނިހެން އިދާރާތަކުން ވެސް ހޯދާނެ ކަމަށް ފުލުހުން ބުންޏެވެ.