ބިންވެރިޔާ ސްކީމުގެ ދަށުން ގޯތި ދޫކުރުމުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ އެއްވެސް ބައިވެރިވުމެއް ނެތްކަމަށް އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވެފައި ވަނިކޮށް، ފުލުހުން މިހާރު ކުރަމުންދާ ގޯތިދިން މައްސަލަތަކުގެ ތަޙުޤީގާއި ގުޅިގެން އެ ކުންފުނީގެ ޗެއާމަން ފިޔަވައި، މެނޭޖިންގ ޑިރެކްޓަރ ހިމެނޭހެން އެޗްޑީސީގެ ބޯޑު އެއްކޮށް ސަސްޕެންޑް ކޮށްފިއެވެ.

ރޭ ބޭއްވި ނޫސްވެރިންގެ ބައްދަލުވުމެއްގައި ފަޒުލް ވިދާޅުވީ ބިންވެރިޔާގެ އެގްރީމެންޓުތައް ހަދަނީ އަދި ބިން ޙަވާލު ކުރަނީވެސް އެޗްޑީސީއަކުން ނޫނެވެ.

"ބިންވެރިޔާ ސްކީމުގެ ރަޖިސްޓަރީ އިޝޫކުރަނީ އެޗްޑީސީގެ ފަރާތަކުން ނޫން، އިޝޫ ކޮށްފައި އޮތީކީ ވެސް އަޅުގަނޑުމެންނެއް ނޫން. ކުރީ ސަރުކާރުގައި އިޝޫ ކޮށްފައި ހުރި ބިންވެރިޔާ ޕްލޮޓްތަކެއްގެ ރަޖިސްޓަރީ އެބަހުރި. އެގްރިމަންޓް ހަދަނީ އެޗްޑީސީގެ ފަރާތަކުން ނޫން. ބިން ހަވާލުކުރަނީ އެޗްޑީސީގެ ފަރާތަކުން ނޫން."

އޭނާ އިތުރަށް ވިދާޅުވީ އެޗްޑީސީގެ ދައުރަކީ ހަމައެކަނި ވަށާފާރު ރޭނުމުގެ ހުއްދަ ދޫކުރުން ކަމަށެވެ. އަދި މައްސަލަ ފާހަގަވި ބައެއް ގޯތިތަކަށް އެ ހުއްދަ ބާތިލުކޮށްފައިވާ ކަމަށްވެސް ރޭ ފަޒުލް ވިދާޅުވިއެވެ.

ފަޒުލް ވިދާޅުވީ މައްސަލަ ފާހަގަވެގެން ހައުސިން މިނިސްޓްރީއަށް އަންގާފައިވަނީ އެޗްޑީސީން ކަމަށާއި، ގޯތީގެ ހައްގުވެރިޔާ ނިންމާނީ މިނިސްޓްރީން ކަމަށެވެ.

ފުލުހުން ޖިނާއީ ތަހުގީގެއް ފަށާފައިވާއިރު، ރޭ ފަޒުލް ވިދާޅުވީ ފުލުހުންގެ ތަހުގީގަށް އެޗްޑީސީން ފުރިހަމަ އެއްބާރުލުން ދޭނެ ކަމަށާއި ބިންވެރިޔާ ސްކީމުގެ ދަށުން ގޯތި ލިބުނު އެއްވެސް މީހަކަށް ގެއްލުމެއް ލިބޭނެ ފަދަ އެއްވެސް ކަމެއް އެ ކުންފުނިން ކޮށްފައި ނުވާނެ ކަމުގެ ޔަގީންކަން އަރުވާ ކަމަށެވެ.