ޑިސެންބަރުމަހުގެ ފުރަތަމަ 17 ދުވަހުގެ ތެރޭގައި ރާއްޖެއަށް 103،560 ފަތުރުވެރިން ޒިޔާރަތްކޮށްފިއެވެ.

ފަތުރުވެރިކަމާބެހޭ ވުޒާރާއިން ހާމަކުރި އެންމެ ފަހުގެ ތަފާސްހިސާބުތަކުން ދައްކާ ގޮތުން މިއީ މިދިޔަ އަހަރުގެ މި މުއްދަތާއި އަޅާބަލާއިރު 2.9 އިންސައްތައިގެ ކުރިއެރުމެކެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 100،652 ފަތުރުވެރިންނެވެ.

ވުޒާރާގެ ތަފާސްހިސާބުތަކުން ދައްކާގޮތުގައި މިހާރު އެވްރެޖްކޮށް ކޮންމެ ދުވަހަކު ރާއްޖެއަށް 6،092 ފަތުރުވެރިން ޒިޔާރަތްކުރެއެވެ. މިއީ މަހުގެ ކުރީކޮޅު ދުވާލަކު 5،000 ފަތުރުވެރިންނާއި އަޅާބަލާއިރު ފާހަގަކޮށްލެވޭ އިތުރުވުމެކެވެ.

އަހަރުގެ މިހާތަނަށް ރާއްޖެއަށް ޒިޔާރަތްކޮށްފައިވާ ފަތުރުވެރިންގެ ޖުމްލަ އަދަދަކީ 1.9 މިލިއަނެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 8.8 އިންސައްތައިގެ ކުރިއެރުމެކެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 1.7 މިލިއަން ފަތުރުވެރިންނެވެ.

ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ ތިން ޤައުމުގެ ގޮތުގައި ޗައިނާ (259،222)، ރަޝިޔާ (214،271)، އަދި އިނގިރޭސިވިލާތް (170،906) ހިމެނެއެވެ.

ސަރުކާރުން މިއަހަރަށް އަމާޒުކޮށްފައިވަނީ 2 މިލިއަން ފަތުރުވެރިން ރާއްޖެއަށް ގެނައުމަށެވެ. އަހަރު ނިމެން 14 ދުވަސް ބާކީ އޮތްއިރު، މި އަމާޒު ހާސިލުކުރުމަށް އިތުރަށް ބޭނުންވަނީ 58،805 ފަތުރުވެރިންނެވެ. ފަތުރުވެރިން އަންނަ މިންވަރަށް ބަލާއިރު، މި އަހަރުގެ އަމާޒު ހާސިލުކުރެވޭނެކަމަށް ބެލެވެއެވެ.