ރަޝިޔާގެ ނިއުކްލިއާ، ބަޔޮލޮޖިކަލް އަދި ކެމިކަލް ޕްރޮޓެކްޝަން ފޯސަސްގެ އިސްވެރިޔާ ލެފްޓިނެންޓް ޖެނެރަލް އިގޯ ކިރިލޯވް އޭނާގެ އެހީތެރިޔާއާ އެކު އަންގާރަ ދުވަހު ގޮވުމެއްގައި މަރުވެފައިވާ ކަމަށް އޭއެފްޕީގެ ނޫސް އެޖެންސީން ބުނެފި އެވެ.

ލެފްޓިނެންޓް ޖެނެރަލް އިގޯ ކިރިލޯވް އާއި އޭނާގެ އެހީތެރިއާ މަރުވީ މޮސްކޯގެ ރެސިޑެންޝަލް އެޕާޓްމަންޓް އިމާރާތަކުން ނުކުންނަނިކޮށް އެ ޢިމާރާތުގެ ބޭރުގައި ސްކޫޓަރެއްގައި ގޮވާ އެއްޗެއް ގޮއްވާލައިގެންނެވެ..

ޔޫކްރޭންގައި ކެމިކަލް ހަތިޔާރު ބޭނުންކުރުމާ ގުޅިގެން އިނގިރޭސިން ވަނީ ޖެނެރަލް އިގޯ ކިރިލޯވްގެ މައްޗަށް މިދިޔަ އޮކްޓޯބަރު މަހު ދަތިކުރުމުގެ ފިޔަވަޅުތައް އަޅާފައެވެ.

މީގެ ގާތްގަނޑަކަށް ތިން އަހަރު ކުރިން ޔޫކްރޭންގެ ހަނގުރާމަ ފެށުނު ފަހުން މޮސްކޯގައި ހިނގި މިފަދަ ގޮވުމެއްގައި މަރުވި ރަޝިޔާގެ އަސްކަރީ އެންމެ މަތީ ވަރިޔަކީ ޖެނެރަލް އިގޯ ކިރިލޯވް އެވެ.

ރަޝިޔާގެ އިންވެސްޓިގޭޓިވް ކޮމިޓީން ބުނާ ގޮތުގައި މިއަދު ހެނދުނު ޖެނެރަލް އިގޯ ކިރިލޯވް މަރާލައިފި ވަނީ މޮސްކޯގެ ރިޔާޒާންސްކީ އެވޭނޫގައި ދިރިއުޅޭ އިމާރާތެއްގެ ބޭރުގައި ޕާކުކޮށްފައި އޮތް ސްކޫޓަރެއްގައި ގޮވާތަކެތި ހަރުކޮށް ގޮއްވާލައިގެންނެވެ..

ގޮވުމުގެ ބާރުގަދަކަމުން އެ ޢިމާރާތުގެ ބިއްލޫރިތައް ތަޅައިގެންގޮސް ގެއްލުންތައް ވެފައި ވެއެވެ.

2017 ވަނަ އަހަރުން ފެށިގެން ޖެނެރަލް އިގޯރ ކިރިލޯވް އަކީ ރަޝިޔާގެ އަސްކަރިއްޔާގެ ރޭޑިއޮލޮޖިކަލް، ކެމިކަލް އަދި ބަޔޮލޮޖިކަލް ޑިފެންސް ޔުނިޓްގެ އިސްވެރިއެކެވެ.

ކެމިކަލް ހަތިޔާރުގެ މުއާހަދާއާއި ހިލާފަށް ޔޫކްރޭން ސިފައިންނާއި ދެކޮޅަށް ރަޝިޔާއިން ކެމިކަލް ކްލޮރޯޕްރީން ބޭނުން ކުރަމުންދާ ކަމަށް އިނގިރޭސިވިލާތާއި އެމެރިކާއިން ވަނީ ތުހުމަތުކޮށްފަ އެވެ.

ފުރަތަމަ ބޮޑު ހަނގުރާމައިގައި ކަރުނަ ގޭހެއްގެ ގޮތުގައި ކްލޮރޯޕްރީން ބޭނުންކުރި އެވެ.

ރަޝިޔާއިން ބުނާ ގޮތުގައި އެގައުމުގެ އަސްކަރިއްޔާއިން މިހާރު ކެމިކަލް ހަތިޔާރު ބޭނުން ނުކުރެއެވެ.