އިޓާލިއަން ސެރީއާގައި ރޭ އިންޓަ މިލާނުން ލާޒިއޯ ކޮޅަށް ސްޓޭޑިއޯ އޮލިމްޕިކޯގައި ހަ ލަނޑު ޖަހައިފިއެވެ. މި މެޗުން ލާޒިއޯ ބަލިވީ 0-6 އިންނެވެ.
މެޗުގެ 41 ވަނަ މިނެޓްގައި ލިބުނު ޕެނަލްޓީއަކުން ލީޑު ނަގައިދިނީ ހަކާން އެވެ. އޭގެ ފަހުން ފުރަތަމަ ހާފް ނިމުމުގެ ކުޑައިރުކޮޅެއް ކުރިން ފެޑެރިކޯ ޑިމާކޯ ލަނޑެއް ޖެހިއެވެ. ދެވަނަ ހާފުގައި ނިކޮލޯ ބަރެލާ، ޑެންޒެލް ޑަމްފްރީސް، ކާލޯސް އޮގަސްޓޯ، އަދި މާކަސް ތޫރަމް މިއިން ކޮންމެ ކުޅުންތެރިއަކު ލަނޑެއް ޖަހައި، ފުރަތަމަ ފަހަރަށް ރަށުން ބޭރުގައި ކުޅުނު މެޗެއްގައި އިންޓަ އިން ތަފާތު ބޮޑު ނަތީޖާއެއް ނެރުނެވެ.
މި މޮޅާއެކު އިންޓަ މިލާން ވަނީ ސެރީއާ ތިން ވަނަ އަށް ދަތުރުކޮށް، 15 މެޗުން 34 ޕޮއިންޓް ހޯދާފައެވެ. އިތުރު އެއް މެޗު ކުޅެފައިވާ އެއްވަނައިގައި އޮތް އެޓަލާންޓާއާ އިންޓައާއި ދެމެދި އޮތީ އެންމެ ތިން ޕޮއިންޓް އެވެ. ލާޒިއޯ އޮތީ ކުޅުނު 16 މެޗުން 31 ޕޮއިންޓާއެކު ފަސްވަނައިގައެވެ.
އިންޓަގެ ކޯޗު ސިމޯން އިންޒާގީ ވަނީ އޭނާގެ ޓީމުގެ ކުޅުންތެރިންނަށް ތަޢުރީފް ކޮށްފައެވެ.
