ރޭ މިއުނިކުގައި ކުޅުނު ޔޫއެފާ ޗެމްޕިއަންސް ލީގުގެ ފައިނަލްގައި އިންޓަރ މިލާން 5-0 އިން ޕެރިސް ސެއިންޓް ޖަރމޭން (ޕީއެސްޖީ) އަތުން ބަލިވުމާއި ގުޅިގެން އެ ޓީމުގެ ކޯޗު ސިމޯނެ އިންޒާގީ ވަނީ މި ބަލިވުމުން ފިލާވަޅު ލިބިގަނެ އަލުން ފެށުމަށް ތައްޔާރުވާ ކަމަށް ބުނެފައެވެ.
އިންޒާގީ ވިދާޅުވީ މި ބަލިވުމުން އިންޓަރ މިލާން އިތުރަށް ވަރުގަދަވެގެން އަންނާނެ ކަމަށެވެ. އޭނާ ވިދާޅުވި ގޮތުގައި މިއީ ވަރަށް ބޮޑު ހިތާމައެއް ކަމަށާއި، ނަމަވެސް މިފަދަ ބަލިވުންތަކުން އިތުރަށް ވަރުގަދަވެވޭނެކަން އެނގޭ ކަމަށެވެ.
"އަޅުގަނޑުމެންނަށް އެނގޭ ބަލިވުމަކުން އިތުރަށް ވަރުގަދަވެވޭނެކަން. މިއީ އިސްތަންބޫލުގައި ބަލިވި ފަދައިން ހިތާމަވެރި ކަމެއް،" އިންޒާގީ ވިދާޅުވިއެވެ.
އިންޒާގީ ވިދާޅުވި ގޮތުގައި ރޭގެ މެޗަކީ އިސްތަންބޫލުގައި ކުޅުނު މެޗާއި ތަފާތު މެޗެއް ކަމަށާއި، ރޭ އިންޓަރ މިލާންގެ ކުޅުންތެރިން ވަރަށް ބޮޑަށް ވަރުބަލިވެފައި ތިބި ކަމަށެވެ. އަދި ޓެކްނިކަލީވެސް ރަނގަޅަށް ނުކުޅެވުނު ކަމަށް އޭނާ ވިދާޅުވިއެވެ.
އިންޒާގީ އިތުރަށް ވިދާޅުވީ އިންޓަރ މިލާން އަލުން ފަށާނެ ކަމަށާއި، މިހާރުވެސް އަންނަ ސީޒަނަށް ދެކުޅުންތެރިން ސޮއިކޮށްފައިވާ ކަމަށެވެ. އަދި އިތުރު ކުޅުންތެރިން ގެންނަން ޖެހޭނެކަންވެސް އެނގޭ ކަމަށް އޭނާ ވިދާޅުވިއެވެ.
"އަޅުގަނޑުމެން އަލުން ފަށާނަން. ވަރުގަދަ އޮގަނައިޒޭޝަނެއް އަޅުގަނޑުމެންގެ ފަހަތުގައި އެބައޮތް. މިހާރުވެސް އަންނަ ސީޒަނަށް ދެކުޅުންތެރިން ސޮއިކޮށްފި. އަދި އިތުރު ކުޅުންތެރިން ގެންނަން ޖެހޭނެކަންވެސް އެނގޭ،" އިންޒާގީ ވިދާޅުވިއެވެ.
އިންޓަރ މިލާންގެ ރައީސް ޖުސެޕެ މަރޮޓާ ވިދާޅުވެފައިވަނީ އިންޒާގީގެ މުސްތަޤުބަލާ ބެހޭ ގޮތުން މަޝްވަރާކުރުމަށް އަންނަ ހަފުތާގައި ބައްދަލުވުމެއް ބޭއްވުމަށް ހަމަޖެހިފައިވާ ކަމަށެވެ.
އިންޒާގީގެ މުސްތަޤުބަލާ ބެހޭ ގޮތުން ކުރެވުނު ސުވާލުތަކަށް ޖަވާބު ދެއްވަމުން އޭނާ ވިދާޅުވީ މި ވަގުތު އެކަމާ ބެހޭ ގޮތުން ވާހަކަ ދެއްކުމަށް ތައްޔާރުނޫން ކަމަށެވެ. އަދި މި ބަލިވުމުގެ ސަބަބުން ވަރަށް ބޮޑަށް ހިތާމަކުރާ ކަމަށެވެ.
އިންޒާގީ ވިދާޅުވީ މުސްތަޤުބަލާ ބެހޭ ގޮތުން ވާހަކަދައްކަން މާ ގިނަ ހިތާމަ ހުރި ކަމަށެވެ. އަދި ފާއިތުވި 58 މެޗުގައި ކުޅުންތެރިން ވަރަށް ބޮޑަށް މަސައްކަތްކޮށްފައިވާ ކަމަށް އޭނާ ވިދާޅުވިއެވެ.
"މުސްތަޤުބަލާ ބެހޭ ގޮތުން ވާހަކަދައްކަން މާ ގިނަ ހިތާމަ އެބަހުރި. ފާއިތުވި އަހަރުގެ ޖުލައި 13 އިން ފެށިގެން ކުޅުނު 58 މެޗުގައި އަޅުގަނޑުމެންނަށް ކުރެވުނު ހުރިހާ ކަމެއް ކޮށްފިން،" އިންޒާގީ ވިދާޅުވިއެވެ.
އިންޒާގީ އަކީ މިހާރު 49 އަހަރުގެ ކޯޗެކެވެ. އޭނާގެ ނަން އަލް-ހިލާލް ކްލަބާ ގުޅުވައި ވާހަކަދެކެވެމުންދާއިރު، އިންޓަރ މިލާންގައި އޭނާގެ ކޮންޓްރެކްޓް އޮތީ އަދި އެއް އަހަރަށެވެ. އިންޒާގީ އަކީ ޗެމްޕިއަންސް ލީގު ފައިނަލުގައި ދެ ފަހަރު ބަލިވެފައިވާ ނުވަވަނަ ކޯޗެވެ.
މި ބަލިވުމާއެކު އިންޓަރ މިލާން ވަނީ ޔޫރަޕިއަން ފައިނަލް ނުވަތަ ޗެމްޕިއަންސް ލީގު ފައިނަލުގެ ތެރެއިން 5 ފައިނަލުގައި ކުޅެ ހަތަރު ފައިނަލްގައި ބަލިވެފައެވެ. އަދި ރޭގެ މެޗަކީ ޗެމްޕިއަންސް ލީގު ތާރީޚުގައި އެންމެ ބޮޑު ތަފާތަކުން ޓީމެއް ބަލިވި ރެޔެވެ.
