މާލޭ ސިޓީ ކައުންސިލްގެ ވައިޓަލް ރަޖިސްޓްރޭޝަން އޮފީހުގައި ހުރި ގިނަ އަދަދެއްގެ ލިޔެކިޔުންތައް މިދިޔަ ބުރާސްފަތި ދުވަހު ރޯވި އަލިފާނުގެ ހާދިސާގައި ގެއްލިފައިވާ ކަމަށް މާލޭ މޭޔަރު އާދަމް އާޒިމް މިއަދު ވިދާޅުވެއްޖެ އެވެ.

^{ފޮޓޯ: މާލެ ސިޓީ ކައުންސިލް}

ހައުސިންގ މިނިސްޓްރީ، ކޮންސްޓްރަކްޝަން މިނިސްޓްރީ އަދި އެންވަޔަރަންމަންޓް މިނިސްޓްރީ ހިންގަމުން އައި އިމާރާތްތަކުގައި ރޯވި އަލިފާނުގެ ސަބަބުން، މާލޭގެ ރައްޔިތުންގެ އުފަންދުވަހުގެ ސެޓްފިކެޓް ފަދަ މުހިންމު ލިޔުންތައް ބަލަހައްޓަމުން އައި ވައިޓަލް ރަޖިސްޓްރޭޝަން އޮފީހަށް ވެސް ބޮޑެތި ގެއްލުންތަކެއް ލިބިފައިވެއެވެ.

މޭޔަރު އާޒިމް ވިދާޅުވި ގޮތުގައި، މި ވަގުތު ގެއްލުން ލިބުނު ތަކެތީގެ އެސެސްމަންޓެއް ހަދަމުން އަންނަ ކަމަށާއި، ލިބުނު ގެއްލުމުގެ ފުރިހަމަ މިންވަރު އެނގޭނީ މި އެސެސްމަންޓް ނިމުމުންނެވެ.

އާޒިމް ވިދާޅުވީ، ސަލާމަތް ކުރެވެން ހުރި އެއްޗެހި ސަލާމަތްކުރުމުގެ މަސައްކަތްތައް ކުރަމުންދާ ކަމަށާއި ޑޮކިއުމެންޓްތައް ލިބެން ހުރި ތަނެއް ބަލައި އެ މަސައްކަތް ކުރަމުން އަންނަ ކަމަށެވެ.

ވައިޓަލް ރަޖިސްޓްރޭޝަން އޮފީހުން ދެމުން އައި ހިދުމަތްތައް މިހާރު ވަނީ ހުޅުމާލޭ އަމީން އެވެނިއުގެ ފުރަތަމަ ފަންގިފިލާގައި ހުންނަ ސިޓީ ކައުންސިލްގެ އޮފީހަށް ބަދަލުކޮށްފައެވެ. އަދި އަލުން މާލޭގައި މި ހިދުމަތް ފެށުމަށްޓަކައި، ރޯވި އިމާރާތުގައި ހުރި ލިޔެކިޔުންތައް ގަލޮޅު މަދަރުސާގައި ހުރި ހޯލަކަށް ބަދަލުކޮށްފައިވާ ކަމަށް މޭޔަރު ވިދާޅުވިއެވެ.

^{ރޯވި އިމާރާތުގައި ހުރި ލިޔެކިޔުންތައް ގަލޮޅު މަދަރުސާގައި ހުރި ހޯލަކަށް ބަދަލުކޮށްފައި. / ފޮޓޯ: މާލެ ސިޓީ ކައުންސިލް}

މީގެ އިތުރުން، މާދަމާ ސަރުކާރުން އިތުރު ސްކޫލެއްގެ ހޯލެއް މި މަސައްކަތަށް ހަމަޖައްސައިދޭނެ ކަމަށް އަންގާފައިވާ ކަމަށާއި، މިކަމުން މަސައްކަތުގެ ސްޕީޑު އިތުރަށް އަވަސްވެގެންދާނެ ކަމަށް ވެސް މޭޔަރު އާޒިމް ފާހަގަކުރެއްވިއެވެ.

ސިޓީ ކައުންސިލްގެ ވައިޓަލް ރަޖިސްޓްރޭޝަން އޮފީހަކީ އުފަންދުވަހުގެ ސެޓްފިކެޓާއި މަރުވާ މީހުންގެ ރެކޯޑުތަކުގެ އިތުރުން ރަށްވެހިކަމާއި ގޯތިތަކުގެ ރަޖިސްޓްރޭޝަން ވެސް ބަލަހައްޓަމުން އަންނަ ތަނެކެވެ.