މޯލްޑިވްސް މީޑިއާ ކައުންސިލްގެ 16 ވަނަ ދައުރުގެ ރިޔާސަތަށް "ތިލަދުން އޮންލައިން"ގެ ހުސައިން ސަގީފް މިއަދު ހޮވިއްޖެއެވެ. ކައުންސިލްގެ މެންބަރުންގެ މެދުގައި ބޭއްވުނު ވޯޓުލުމުގައި ސަގީފަށް 8 ވޯޓު ލިބުނެވެ.

ސަގީފާ ވާދަކުރެއްވި "މިހާރު" ގެ ފާތިމަތު ޝަނާ މުހައްމަދަށް ލިބުނީ 7 ވޯޓެވެ. މި އިންތިޚާބު ނިމުނީ ދެ ބުރަކަށް ވޯޓުލައިގެންނެވެ. އިއްޔެ ބޭއްވުނު ފުރަތަމަ ބުރުގައި ދެ ކެންޑިޑޭޓުން 7-7 އިން އެއްވަރުވުމާއި ގުޅިގެން، މިއަދު ދެވަނަ ބުރެއް ބޭއްވުނެވެ.

ކުރިން ކައުންސިލްގެ ނައިބު ރައީސްކަން ކުރައްވާފައިވާ ސަގީފް މިފަހަރު ރައީސަކަށް ހޮވުނުއިރު ކައުންސިލްގެ ނައިބު ރައީސްކަމަށް އިއްޔެ ހޮވިފައިވަނީ އަމިއްލަގޮތުން ކުރިމަތިލެއްވި އިބްރާހިމް މުހައްމަދެވެ. އޭނާއަށް 9 ވޯޓު ލިބުނުއިރު، ވާދަކުރި އިބްރާހިމް ފައުޒީއަށް ލިބުނީ 6 ވޯޓެވެ.

މޯލްޑިވްސް މީޑިއާ ކައުންސިލްގައި ހިމެނެނީ މީޑިއާތަކުން 8 ނޫސްވެރިންނާއި އަމިއްލަގޮތުން 7 މެންބަރުން ހިމެނޭ ގޮތަށް ޖުމްލަ 15 މެންބަރުންނެވެ. މި ކައުންސިލްގެ ކޮންމެ ދައުރެއްގެ މުއްދަތަކީ ދެ އަހަރު ދުވަހެވެ.