ރާއްޖޭގައި ކޮކޮނަޓް ހިސްޕިޑް ބީޓްލް ކޮންޓްރޯލްކުރުމަށްޓަކައި ނެޗްރަލް އެނެމީ ލެބޯޓަރީއެއް ގާއިމުކުރުމަށް ޗައިނާގެ ކަމާ ބެހޭ މާހިރުން ދިރާސާ ފަށައިފިއެވެ. މި މަސައްކަތް ފެށިފައިވަނީ ދިވެހިރާއްޖެ އާއި ޗައިނާ ސަރުކާރާ ދެމެދު ވެވިފައިވާ އެއްބަސްވުމެއްގެ ދަށުންނެވެ.
ދަނޑުވެރިކަމާއި ދިރޭތަކެއްޗާބެހޭ ވުޒާރާއިން ބުނީ، ކޮކޮނަޓް ހިސްޕިޑް ބީޓްލްއަކީ ރާއްޖޭގެ ރުއްތަކަށް އެންމެ ނުރައްކާތެރި ގެއްލުންދޭ ސޫފިކަމަށް ފާހަގަކުރެވިފައިވާތީ، މި ބާވަތުގެ މަޑި ކޮންޓްރޯލްކޮށް ރާއްޖޭގެ ތިމާވެއްޓާ ގުޅޭ އަދި އެކަށީގެންވާ ހައްލެއް ހޯދުމަށްޓަކައި މި މަސައްކަތް ކުރިއަށް ގެންދާކަމަށެވެ. އަދި ލެބޯޓަރީގައި މަސައްކަތްކުރާ މުވައްޒަފުން ތަމްރީން ދިނުމުގެ ޕްރޮގްރާމްތައް ހިންގުމަށް ވެސް މި އެއްބަސްވުމުގައި ހިމެނޭކަމަށް ވުޒާރާއިން ބުންޏެވެ.
ވުޒާރާއިން ބުނީ، ޗައިނާގެ ފަންނީ މާހިރުންގެ ޓީމުތަކުން މިހާރު ރާއްޖެ އައިސް ލެބޯޓަރީ ގާއިމުކުރުމަށްޓަކައި ހަދަންޖެހޭ ދިރާސާތަކުގެ ފަހުގެ މަރުހަލާތައް ނިންމަމުންދާކަމަށެވެ. އަދި ހަނިމާދޫ އެގްރިކަލްޗަރ ސެންޓަރަކީ މިފަދަ ލެބޯޓަރީއެއް ގާއިމުކުރުމަށް އެކަށީގެންވާ ތަނެއްކަމުގައި އެ ޓީމުން ނިންމާފައިވާކަމަށާއި ހަނިމާދުއަކީ މި މަޑީގެ އުނދަގޫ ވަރަށް ބޮޑުވެފައިވާކަމަށް ފާހަގަކުރެވިފައިވާ ރަށެއްކަމަށް ވެސް ވުޒާރާއިން ފާހަގަކުރިއެވެ.
Advertisement
އެގޮތުން، މި ލެބޯޓަރީގައި ދިރާސާ ކުރުމަށް ރޭވިފައިވާ އެންމެ މުހިއްމު އެއްކަމަކީ ކޮކޮނަޓް ހިސްޕިޑް ބީޓްލްއަށް ހަމަލާދޭ ޕެރެސިޓޮއިޑް އާލާކޮށް ގިނަކުރެވޭނެ ގޮތްތައް ހޯދުންކަމަށް ވެސް ވުޒާރާއިން ހާމަކުރިއެވެ.
މީގެއިތުރުން، ޗައިނާގެ މާހިރުންގެ ޓީމުން، އެގްރިކަލްޗަރ މިނިސްޓްރީގެ ފަންނީ މުވައްޒަފުންނާއެކު ހއ. މާފަހީގައި ހިސްޕިޑް ބީޓްލް ކޮންޓްރޯލްކުރުމަށް މިހާރު ފަށާފައިވާ މަސައްކަތް ބަލައި މަޢުލޫމާތު ހިއްސާކޮށްފައިވާ ކަމަށްވެސް ވުޒާރާއިން ބުންޏެވެ.
