ވިސާއެއް ނެތި ރާއްޖޭގައި ދިރިއުޅެމުންދިޔަ ފްރާންސްގެ އާއިލާއެއް ވަކި ގައުމަކަށް ފުރުމަށް އިމިގްރޭޝަނުން ނާންގާނެ ކަމަށް ކޮންޓްރޯލަރ އޮފް އިމިގްރޭޝަން މުޙައްމަދު ޝަމްޢާން ވަހީދު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި އިމިގްރޭޝަން ކޮންޓްރޯލަރ މުޙައްމަދު ޝަމްއާން ވިދާޅުވީ ދިވެހިރާއްޖޭގެ އިމިގްރޭޝަންގެ ޤާނޫނާއި ޚިލާފަށް ފްރާންސަށް ނިސްބަތްވާ ހަ މީހުންގެ އާއިލާއެއް ރާއްޖޭގައި ދިރިއުޅެމުންދާ ކަމުގެ މައުލޫމާތު 'އިމިގްރޭޝަން ވޮޗް' އަށް 2024 ޖުލައި 18 ވަނަ ދުވަހު ލިބުނު ކަމަށެވެ.

"މި އާއިލާގެ ޓްރެވަލް ޑޮކިއުމަންޓު ހޯދުމުގެ މަސައްކަތް ފޮރިން މިނިސްޓްރީއާއި ގުޅިގެން އިމިގްރޭޝަނުން ކުރަމުންދަނީ," ޝަމްއާން ވިދާޅުވިއެވެ. "ނަމަވެސް، އެ މީހުން ވަކި ގައުމަކަށް ފުރުމަށް އިމިގްރޭޝަނުން ނާންގާނެ."

އިމިގްރޭޝަން ޤާނޫނާއި ޚިލާފަށް ދިވެހިރާއްޖޭގައި އުޅުމަށް އެއްވެސް ފަރާތަކަށް ފުރުސަތެއް ނުދެވޭނެ ކަމަށް ވިދާޅުވާ ވިދާޅުވުން ތަކުރާރު ކުރައްވަމުން ޝަމްއާން ވިދާޅުވީ އިމިގްރޭޝަނަށް ލިބުނު ރިޕޯޓާއި ގުޅިގެން އެ އާއިލާގެ އިސް ފަރާތް އޮކްޓޫބަރު 23 ވަނަ ދުވަހު އިމިގްރޭޝަނަށް ހާޒިރު ކުރެވުނު ކަމަށެވެ.

ފްރާންސަށް ނިސްބަތްވާ މި އާއިލާ ރާއްޖޭގައި ދިރިއުޅޭތާ 12 އަހަރު ވެފައިވާ ކަމަށާއި، އެ އާއިލާ އެނބުރި ފްރާންސަށް ދާން ބޭނުން ނުވާ ކަމަށް ވެސް ޝަމްއާން ފާހަގަކުރެއްވިއެވެ.