ރާއްޖޭގެ ވަޒީފާގެ ބާޒާރާ ގުޅޭ ސާވޭއެއް މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން މިއަދު ފަށައިފިއެވެ.
އެމްބީއެސްގެ ސާކިއުލާއެއްގައި ބުނީ "ލޭބާ ފޯސް ސާވޭ 2024"ގެ ނަމުގައި ކުރިއަށް ގެންދާ މި ސާވޭއަށް ބޭނުންވާ މަޢުލޫމާތު ނެގުން ކުރިއަށް ގެންދަނީ މިއަދުން ފެށިގެން އަންނަ ހޮނިހިރު ދުވަހުގެ ނިޔަލަށް ކަމަށެވެ. މި ސާވޭ ކުރިއަށް ގެންދާނީ މާލެ އާއި ވިލިމާލެ އަދި ހުޅުމާލޭގައި ކަމަށް ވެސް އެ އިދާރާއިން ބުންޏެވެ.
މި ސާވޭއަށް ސާމްޕަލްތައް ނަގާނީ ރޭންޑަމްކޮށް ހޮވާލެވިފައިވާ ގޭބިސީތަކަށް ގޮސްގެން ކަމަށް ވެސް އެ އިދާރާއިން ބުންޏެވެ.
Advertisement
އެމްބީއެސް އިން ވަނީ މި ސާވޭއަށް ގޭބިސީތަކުން އެއްބާރުލުން ދިނުމަށް އެދިފައެވެ.
މި ސާވޭގެ މަޤުޞަދުތަކީ އިޤުތިޞާދީ ގޮތުން ހަރަކާތްތެރިވާ އާބާދީ ދެނެގަތުމާއި ލޭބާ ފޯސް ޕާޓިސިޕޭޝަން ރޫޓް ދެނެގަތުމާއި އަލަށް ވަޒީފާ އުފެދޭ ވަރު ދެނެގަތުމާއި އެމްޕްލޯއިމަންޓް އަދި އަންއެމްޕްލޯއިމަންޓް ރޭޓް ދެނެގަތުމެވެ. އަދި ހިޖުރަކުރުމުގެ ރޭޓް ހޯދުމާއި އާބާދީގެ ޕްރޮޖެކްޝަންތައް އަޕްޑޭޓްކުރުމަށް ބޭނުންވާ ޑޭޓާ ހޯދުމާއި ޑީސެންޓް ޖޮބްސް އިންޑިކޭޓާ އެކުލަވާލުމަށް ބޭނުންވާ ޑޭޓާ ހޯދުމުގެ އިތުރުން ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލްވާވަރު ދެނެގަތުމަކީ ވެސް މި ސާވޭގެ މަޤުޞަދެކެވެ.
އެމްބީއެސް އިން ބުނީ މި ސާވޭގެ ބޭނުމަށް އެއްކުރާނީ މީހުންގެ ތަޢުލީމީ ފެންވަރާއި އާމްދަނީގެ ތަފުސީލާއި ހިޖުރަކުރުމާއި ގޭތެރޭގެ މަސައްކަތްތަކުގައި ހޭދަކުރާ ވަގުތާއި މީހުންގެ އާންމު މައުލޫމާތާއި ވަޒީފާ އާއި އާމްދަނީ ހޯދުމުގެ މަސައްކަތްކުރާ އާބާދީ އަދި ހިލޭސާބަހަށް މަސައްކަތްކުރާ އާބާދީއާ ގުޅޭ މަޢުލޫމާތު ކަމަށެވެ.
"މިއީ ގޭބީސީގެ މެންބަރުންގެ އަގުހުރި ވަގުތާއި އެއްބާރުލުން ނިހާޔަތައް ބޭނުންވާ ސާވޭއެއް ކަމުން މި މުހިންމު ޤައުމީ މަސައްކަތުގައި ފުރިހަމައަށް އެއްބާރުލުން ދިނުމަށް ހޭދަކުރާ ވަގުތަކީ ރާއްޖޭގެ ތަފާސްހިސާބު ނިޒާމް ހަރުދަނާކުރުމަށް ވެވޭ ނުހަނު އަގުހުރި ޤައުމީ ޚިދުމަތެއްކަން ފާހަގަކޮށް، މި ފުރުޞަތުގައި ތިޔަ ގޭބިސީގެ އެންމެހާ ފަރުދުންނަށް ނުހަނު އިހުލާސްތެރިކަމާއެކު ޝުކުރު ދަންނަވަމެވެ." އެމްބީއެސް ސާކިއުލާގައި ބުންޏެވެ.
