މާލޭގައި ޒަރޫރީ މުދަލުގެ އަގުތައް މިދިޔަ އޮކްޓޯބަރު މަހު ދަށްވެފައިވާ ކަމަށް މޯލްޑިވްސް ބިއުރޯ އޮފް ސްޓެޓިކްސް (އެމްބީއެސް) އިން ހާމަކޮށްފިއެވެ.

އެމްބީއެސް އިން އާއްމުކުރި ތަފާސްހިސާބުތައް ދައްކާގޮތުން މާލޭގެ ޒަރޫރީ މުދަލުގެ އަގުތަކުގެ އިންޑެކްސް (އީސީޕީއައި) ސެޕްޓެމްބަރު މަހާ އަޅާބަލާއިރު، އޮކްޓޯބަރުގައި ވަނީ 0.98 ޕަސެންޓް ދަށަށް ގޮސްފައެވެ. މާލޭގައި 114.04 ޕަސެންޓުގައި ހުރި ޒަރޫރީ މުދަލުގެ އިންފްލޭޝަން ދަށަށް ދިޔުމުގެ މައިގަނޑު ސަބަބަކީ، ކާބޯތަކެތީގެ ބާވަތްތަކުގެ އަގު ހެޔޮވުމެވެ.

މަހުން މަހަށް ބަލާއިރު، ކާބޯތަކެތީގެ ސީޕީއައި ވަނީ 1.49 ޕަސެންޓަށް ދަށްވެފައެވެ. އެގޮތުން މޭވާގެ ބާވަތްތަކުން 7.94 ޕަސެންޓް ދަށަށް ދިޔައިރު، ތަރުކާރީން 0.98 ވަނީ ދަށްވެފަ އެވެ. އަދި ހަކުރު، ޖޭމު، މާމުއި، ޗޮކްލެޓް އަދި ފޮނިކާތަކެތީގެ ބައިން 1.15 ޕަސެންޓް ދަށަށް ގޮސްފައިވެއެވެ.

ނަމަވެސް، ކިރު، ކިރުގެ އުފެއްދުންތައް އަދި ބިހުގެ ބާވަތްތަކުން 0.38 ޕަސެންޓަށް އަގުތައް އުފުލިފައިވާކަން ފާހަގަކޮށްލެވެއެވެ. އަދި ބުއިންތަކުގެ އަގުވެސް ސެޕްޓެމްބަރު މަހާ އަޅާބަލާއިރު އޮކްޓޯބަރު މަހުގައި ވަނީ 0.45ޕސެންޓަށް އިތުރުވެފައެވެ. އޭގެ އިތުރުން ގޭހާ އެހެނިހެން ތެލުގެ ބާވަތްތަކުގެ އަގުވެސް ވަނީ 0.64 ޕަސެންޓަށް އިތުރުވެފައެވެ.

ރާއްޖޭގައި ޒަރޫރީ ކާބޯތަކެތީގެ އަގުތައް ދަށަށްދާކަން ފާހަގަކުރެވޭއިރު، ސަރުކާރުން ވަނީ ދިވެހިން އާއްމުކޮށް ބޭނުން ކުރާ ތަރުކާރީ އާއި މޭވާ ހިމެނޭހެން 23 ބާވަތެއް އެސްޓީއޯ މެދުވެރިކޮށް ގެނެެސް، ވިއްކަން ފަށައިފައެވެ.