ސޫދާނުގައި ހިނގަމުންދާ ހަނގުރާމައިގައި މިދިޔަ ހޯމަ އަދި އަންގާރަ ދުވަހު މަދުވެގެން 127 މީހުން މަރާލައިފި ކަމަށް މަސްދަރުތަކުން ބުނެފިއެވެ. އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން ބުނާ ގޮތުގައި މަރުވި މީހުންގެތެރޭގައި ގިނައީ އާންމު ރައްޔިތުންނެވެ.
ސޫދާނުގެ ސަރުކާރު ސިފައިންނާއި ރެޕިޑް ސަޕޯޓް ފޯސް (އާރްއެސްއެފް) އާއި ދެމެދު ހިނގަމުންދާ މި ހަނގުރާމައިގައި ދެފަރާތުން ވެސް އާންމުން ދިރިއުޅޭ ސަރަޙައްދުތަކަށް ހަމަލާދެމުންދާކަމަށް ޚަބަރުތައް ބުނެއެވެ. މީގެ ތެރޭގައި ބޮންތަކާއި ބޮޑެތި ހަތިޔާރުތަކުން އަމާޒުކޮށް ދޭ ހަމަލާތައް ހިމެނެއެވެ.
ނޯތު ޑާފަރގެ ކަބްކަބިޔާ ރަށުގެ މާރުކޭޓަށް ހޯމަ ދުވަހު 8 ބޮމުގެ ހަމަލާ ދީފައިވާ ކަމަށް އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން ބުނެއެވެ. މި ހަމަލާގައި 100 އަށްވުރެ ގިނަ މީހުން މަރުވެ، ސަތޭކަ އެތައް ބަޔަކު ޒަޚަމްވިކަމަށް ބުނެއެވެ.
މީގެއިތުރުން އަންގާރަ ދުވަހު އާރްއެސްއެފްއިން އުމްދުރުމާން ސަރަޙައްދަށް ދިން ހަމަލާއެއްގައި މަދުވެގެން 20 މީހުން މަރުވެފައިވާ ކަމަށް ވެސް ހަބަރުތައް ބުނެއެވެ. މީގެ ތެރޭގައި ބަހެއްގައި ދަތުރުކުރަމުންދިޔަ 14 މީހުން ހިމެނެއެވެ.
ދެ އަހަރާއި ގާތްކުރާ މި ހަނގުރާމައިގެ ސަބަބުން މިހާތަނަށް 12 މިލިއަނަށްވުރެ ގިނަ މީހުން ގެދޮރު ދޫކޮށް ފިލާފައިވާ ކަމަށް އދ. އިން ބުނާއިރު 30 މިލިއަނަށްވުރެ ގިނަ މީހުން ތިބީ ހާލުގައި ޖެހިފައެވެ.
