ވިލިމާލޭގައި ދިރިއުޅޭ ކުޑަކުދިންނަށް ޚާއްސަކޮށްގެން "އަވައްޓެރި ބީޗް ފެސްޓް 2024"ގެ ނަމުގައި އެ އަވަށުގައި މޫދު ކުޅިވަރުގެ ޚާއްސަ ހަރަކާތެއް ފުލުހުން މިއަދު ބާއްވައިފިއެވެ.
ފުލުހުން ބުނީ މިއީ ތުއްތު ކުދިންނަށް އަމާޒުކޮށްގެން ވިލިމާލެ ފުލުހުންނާއި ލިކުއިޑް ވޯޓާ ސްޕޯޓްސްއިން އިސްނަގައިގެން ވިލިމާލޭގައި ބޭއްވި ހަރަކާތެއް ކަމަށެވެ،
މި ހަރަކާތަކީ ރައްޔިތުންނާއި ފުލުހުން ގުޅުން ބަދަހިކޮށް ވީހާ ވެސް ގާތުން މަސައްކަތްކުރުމަށް މަގުފަހިކުރުމުގެ އިތުރުން ވިލިމާލޭގެ ރައްޔިތުންގެ މެދުގައި ގުޅުން ބަދަހިކުރުމުގެ ގޮތުން ކުރިއަށް ގެންދިޔަ ހަރަކާތައް ކަމަށް ވެސް ފުލުހުން ބުންޏެވެ.
މި ހަރަކާތް ބޭއްވީ މިއަދު ހެނދުނު 07:00 އިން 11:00 އަށެވެ. މި ހަރަކާތުގައި މުނިފޫހިފިލުވުމާއި މަޢުލޫމާތު ފޯރުކޮށްދިނުމުގެ އިތުރުން އާންމުންނާ ގުޅުން ބަދަހިކުރުމަށް ގިނަ ހަރަކާތްތަކެއް ކުރިއަށް ގެންދިޔައެވެ.
"އަވައްޓެރި ބީޗް ފެސްޓް 2024" ޝަރަފުވެރި ކޮށްދެއްވީ ޕޮލިސް ކޮމިޝަނަރު އަލީ ޝުޖާއު އެވެ.
ޝުޖާއު ވިދާޅުވީ މި ކަހަލަ އިވެންޓުތަކުން ފުލުހުންނާއި އާންމުންނާ ދެމެދު އޮންނަ ގުޅުން ބަދަހިވެ، މުޖުތަމައު އިތުރަށް ރައްކާތެރިކޮށް އަދި ދުޅަހެޔޮ މުޖުތަމައަކަށް ހެދުމަށް މަގުފަހިވާނެ ކަމަށެވެ. އަދި މި ހަރަކާތަށް ވިލިމާލެ ރައްޔިތުންގެ ފަރާތުން ލިބުނު އެއްބާރުލުމާއި ތަރުހީބަށް އޭނާ ޝުކުރު އަދާކުރެއްވިއެވެ.
ފުލުހުން ބުނީ އެ ހަރަކާތުގައި ތަފާތު އުމުރުފުރާތަކަށް އަމާޒުކޮށްގެން ގިނަ ހަރަކާތްތަކެއް ކުރިއަށް ގެންދިޔަ ކަމަށެވެ. އޭގެ ތެރޭގައި ކަޔަކިން، ވޮލީބޯޅަ މެޗުތައް، ކުޑަކުދިންގެ ވާދަމާ މުބާރާތް، އަލިފާނުގެ ރައްކާތެރިކަމާ ގުޅޭ މަޢުލޫމާތު ފޯރުކޮށްދިނުން، އަދި ކުޑަކުދިންގެ އާޓް މުބާރާތްތަކާއި އެހެނިހެން މޫދު ކުޅިވަރުތައް ހިމެނެއެވެ.
މަގުމަތީގެ ރައްކާތެރިކަމާއި ސައިބަރ ކްރައިމް އާއި ކުޑަކުދިންނާ ގުޅުންހުރި މައުލޫމާތާއި ފުލުހުން ފޯރުކޮށްދޭ އެހެނިހެން މުހިންމު ޚިދުމަތްތަކާ ބެހޭ ގޮތުން މަޢުލޫމާތު ދިނުން ވެސް އެ ހަރަކާތުގެ ތެރެއިން ކުރިއަށް ގެންގޮސްފައިވާ ކަމަށް ފުލުހުން ބުންޏެވެ.
ފުލުހުން ބުނި ގޮތުގައި، މި ހަރަކާތުގައި 800 އަށް ވުރެ ގިނަ ކުދިން ބައިވެރިވިއެވެ. އަދި މި ހަރަކާތުގެ ތެރެއިން ކުރިއަށް ގެންދިޔަ ހެނދުނުގެ ނާސްތާ ތައްޔާރުކޮށްދެއްވާފައި ވަނީ ހަރަކާތުގައި ބައިވެރިވި ކުދިންގެ ބެލެނިވެރިން ކަމަށް ފުލުހުން ބުންޏެވެ.
