އައު އަހަރުގެ އަޒުމަކަށް ދިވެހި ބަހާއި ދިވެހިވަންތަކަމަށް އިސްކަންދިނުން ހެދުމަށް ދިވެހި ބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހިމް ގޮވާލައްވައިފިއެވެ.
މިފަދައިން ވަޒީރު ގޮވާލެއްވީ ރޭ ބޭއްވި އަދަބީ މުބާރާތުގެ ނަތީޖާ ފާޅުކުރުމުގެ ރަސްމިއްޔާތުގައި ވާހަކަދައްކަވަމުންނެވެ.
ވަޒީރު ވިދާޅުވީ ކޮންމެ އަހަރަކުވެސް ކުދިން އަމިއްލައަށް ހާސިލުކުރަން ބޭނުންވާ ކަންކަމަށް އަޒުމް ކަނޑައަޅާ ކަމަށާއި، އަންނަ އަހަރުވެސް މިގޮތަށް އަޒުމް ކަނޑައެޅުން މުހިންމު ކަމަށެވެ. އެގޮތުން، ދިވެހި ބަހާއި ދިވެހިވަންތަކަމަށް އިސްކަންދިނުމަކީ އައު އަހަރުގެ އަޒުމަކަށް ހެދުމަށް ވަޒީރު އެދިވަޑައިގެންނެވިއެވެ.
Advertisement
"އައު އަހަރުގެ އަޒުމު ތެރޭގައި ނޯޓްނެގުން މީގެ ފަހުން ދިވެހިބަހަށް ބަދަލުކުރުން. އަޅުގަނޑު މީގެ ފަހުން ނޯޓް ނަގާނީ ދިވެހި ބަހުންނޭ. ދެވަނަ ކަމަކަށް ދިވެހި ބަހުން ނޫނީ ވާހަކަ ނުދައްކާނެ ރަހުމަތްތެރިއެއް ބެހެއްޓުން. ބޭނުންވަންޏާ ހުރިހާ ރައްޓެހިންނާވެސް ދިވެހި ބަހުން ވާހަކަ ދެއްކިދާނެ. 3 ވަނަ ކަމަކަށް އެ ކުއްޖަކު ނިސްބަތްވާ ރަށެއްގެ ކަންކަން ހަރު މީހުން ގާތު އަހާގެން ތާރީޚު ހޯދުން" ވަޒީރު ވިދާޅުވިއެވެ.
މީގެ އިތުރުން، ދަރިވަރުން މަޒުމޫނު ލިޔުމުގައި މާމަ ނުވަތަ ކާފަގެ ތަޖުރިބާތަކުގެ ވާހަކަތައް ގެނެސްދިނުން މުހިންމުކަމަށްވެސް ވަޒީރު ފާހަގަކުރެއްވިއެވެ. އަދި އުފެއްދުންތެރިކަމުގައި އަބަދުވެސް އާ ޚިޔާލުތަކާއި ވިސްނުންތައް ބޭނުންކުރުމުގެ މުހިންމުކަންވެސް ވަޒީރު ފާހަގަކުރެއްވިއެވެ.
ރޭގެ ރަސްމިއްޔާތުގައި މަޒުމޫނު ލިޔުމުގެ މުބާރާތާއި، ޅެން ހެދުމުގެ މުބާރާތާއި، ކުރުވާހަކަ ލިޔުމުގެ މުބާރާތުގެ ނަތީޖާ ވަނީ އިޢުލާނުކޮށްފައެވެ. މި މުބާރާތްތަކުގައި ސުކޫލުތަކުގެ ބައިންނާއި އަމިއްލަ ފަރާތްތަކުގެ ބައިން ވަނަތައް ހޮވާފައިވެއެވެ.
