ދިވެހި ބަހާއި ސަގާފަތާ ބެހޭ މިނިސްޓްރީގެ އެކްޓިން ޕާމަނަންޓް ސެކްރެޓަރީ އާތިކާ އިބްރާހިމްގެ މައްސަލަ ބޮޑުވެފައި ވަނިކޮށް، އެ މިނިސްޓްރީއަށް އާ ޕާމަނަންޓް ސެކްރެޓަރީ (ޕީއެސް) އެއް ސިވިލް ސާވިސް ކޮމިޝަން (ސީއެސްސީ) އިން މިއަދު ހަމަޖައްސައިފިއެވެ.
ސީއެސްސީން މިއަދު ނެރުނު ބަޔާނެއްގައި ބުނެފަވަނީ، ދިވެހި ބަހާއި ސަގާފަތާ ބެހޭ މިނިސްޓްރީގެ ޕީއެސްގެ މަޤާމަށް މުހައްމަދު ޔާނިއު ހާޝިމް އައްޔަންކޮށްފައިވާ ކަމަށެވެ. ޔާނިއު ކުރިން ވަނީ ހައުސިން މިނިސްޓްރީ އަދި އިސްލާމިކް ޔުނިވާސިޓީގައި މަސައްކަތް ކުރައްވާފައެވެ.
މުހައްމަދު ޔާނިއު ހާޝިމް މި މަޤާމަށް އައްޔަންކުރީ، އެކްޓިން ޕީއެސް އާތިކާ އިބްރާހިމް އިސްވެ ހުންނަވައި، އެ ތަނުގެ ސިވިލް މުވައްޒަފުންނަށް ޖެއްސުންކޮށް، ބުލީކުރާ ކަމަށް ބުނާ މައްސަލަތަކެއް ފެންމަތިވެފައިވަނިކޮށެވެ. މިނިސްޓްރީގެ ކުރީގެ ޕީއެސް ޝަމްއޫން ހަމީދުގެ ފަސް އަހަރުގެ ދައުރު މިދިޔަ މާޗު މަހު ހަމަވުމާއި ގުޅިގެން، އޭގެ ފަހުން އެ މަޤާމުގެ މަސްއޫލިއްޔަތު އަދާކުރަމުން ގެންދިޔައީ އާތިކާއެވެ.
Advertisement
އާތިކާގެ އަމަލުތަކާ މެދު ހިތްހަމަނުޖެހިގެން، މިނިސްޓްރީގެ ސިވިލް ސާވިސް މުވައްޒަފުންތަކެއް ވަނީ ސީއެސްސީއަށް ޕެޓިޝަނެއް ހުށަހަޅާފައެވެ. އެ ޕެޓިޝަންގައި ބުނެފައިވަނީ، އާތިކާ މުވައްޒަފުންގެ ހައްގުތަކަށް ބެލުމެއް ނެތި، އުސޫލުތަކުގެ ބޭރުން އަދި ވަޒީފާގެ މަސްއޫލިއްޔަތުތަކަށް ރިއާޔަތްކުރުމެއް ނެތި ބުލީކުރުމުގެ އުސޫލުން ކަންކަން ކުރަމުން ގެންދާ ކަމަށެވެ.
މި މައްސަލައާ ގުޅިގެން، މިނިސްޓްރީގެ މުވައްޒަފުންތަކެއް ވަނީ ރައީސް ޑރ. މުހައްމަދު މުއިއްޒާ ބައްދަލުކުރަން މިދިޔަ މަހު ރައީސް އޮފީހުގައި އެދިފައެވެ. ނަމަވެސް، މިނިސްޓަރު އާދަމް ނަސީރު މިދިޔަ މަހު ބޭއްވި ޕްރެސް ކޮންފަރެންސްގައި ވިދާޅުވެފައިވަނީ، މައްސަލަ ހުރި ކަމަށް ބުނާ މުވައްޒަފަކީ ވެސް އެ މިނިސްޓްރީގެ މަސައްކަތްތައް ވަރަށް ފަރުވާތެރިކޮށް އަދި ރަނގަޅަށް ކުރާ މުވައްޒަފެއް ކަމަށެވެ. އަދި އާތިކާގެ މައްސަލަ ރަސްމީކޮށް ހުށަހަޅާފައިނުވާ ކަމަށް ވެސް އޭނާ ވިދާޅުވިއެވެ.
